Disa kandidate për Miss Universe Indonezia kanë denoncuar në polici organizatorët për abuzim seksual.
Konkurrenteve u është kërkuar të hiqnin të brendshmet e tyre për “kontroll të trupit” dhe janë fotografuar dy ditë përpara finales më 3 gusht, tha një nga avokatët e tyre.
Organizatorët dyshohet se u thanë grave se duhej “të ekzaminonin çdo plagë, celulit ose tatuazh në trupat e tyre”.
“Ndjej se të drejtat e mia janë shkelur”, tha një nga garueset. “Ka ndikuar mendërisht te unë. Kam pasur probleme me gjumin,” tha ajo, duke folur për mediat, së bashku me ankueset e tjera, në fillim të kësaj jave.
Mellisa Anggraeni, një avokate që përfaqëson tre nga garueset që u ankuan, tha se shumë vajza të tjera do të denoncojnë.
Policia në kryeqytetin Xhakarta lëshoi një deklaratë duke thënë se do të hetojë më tej. Organizata Miss Universe Indonesia do të hetojë akuzat, tha në një deklaratë pronarja e saj e famshme Poppy Capella. Organizata globale Miss Universe tha gjithashtu se ishte duke e shqyrtuar këtë çështje dhe se i merr “shumë seriozisht” akuzat për ngacmimet seksuale.
Ndërsa kontrollet e trupit janë normale në vend, konkurrentëve zakonisht nuk u kërkohet të zhvishen lakuriq, tha Maria Harfanti, një ish-Miss Indonezia. Ajo shtoi se organizatorët gjithashtu shpesh kërkojnë BMI ose indeksin e masës trupore të garuesve për të kontrolluar përmasat e trupit të tyre.
Në konferencën për shtyp të së hënës, një nga ankuesit tha se kontrollet trupore ishin bërë në një dhomë të mbyllur, por aty ishin edhe disa burra. Dera nuk ishte mbyllur plotësisht, duke u dhënë njerëzve jashtë mundësinë për të parë, shtoi ajo.
Konkurset e bukurisë janë lejuar prej kohësh në Indonezi, por organizatorët janë të kujdesshëm që të mos ofendojnë pjesët konservatore të shoqërisë./Opinion.al
