TIRANË- Kryetari i LSI, Ilir Meta e ka nisur fjalën përshëndetëse në kongresin e PS me një batutë. “Do ishte mirë që para meje ta merrte fjalën trajneri i Kombëtares Gianni de Biasi”, tha Meta sapo i ngjit në podiumin e Pallatit të Kongreseve. “Pasi këtu folën gjithë këta italiane do ishte radha e De Biasit”, tha Meta. Atij iu dha fjala përshëndetëse pas socialistëve italianë që kanë ardhur të përshëndesin këtë kongres Massimo D’Alema dhe Gianni Pittella.
“Vendosa ta ndryshoj fjalimin tim pasi dëgjova Gianni Pittellën, kur tre vejt më parë me nxitjen e tij dhe socialistëve evropianë krijuam Aleancën për Shqipërinë Evropiane. Në tre vjet ka arritur dy fitore mjaft bindëse, duke rikonfirmuar një të vërtetë të thjeshtë dhe histori se kur e majta është e bashkuar fiton gjithmonë bindshëm”, vijoi kreu i LSI.
Ndërsa më tej Meta u shpreh: Kjo nuk mjafton se fitorja nuk është qëllim në vetvete. Në tre vjet vendi ka pasur ndryshime të rëndësishme. Ka hyrë në rrugën e ringritjes. Sot jemi në momentin më të rëndësishëm, për realizmin e kryereformës, asaj në drejtësi, që është momenti më i rëndësishëm për të garantuar reformat e tjera që po bëhen dhe do të bëhen duke miratuar këtë reformë. Do të japim një mesazh të rëndësishëm për qytetarët tanë dhe partnerët tanë për forcimin e shtetit ligjor, luftën kundër korrupsionit dhe krimit të organizuar”.
