Konfederata e Industrive i kërkon Kuvendit të shtyjë miratimin për heqjen e TVSH -së për biznesin e vogël me xhiro vjetore deri në 5 milionë lekë dhe uljen e tatimit për ato me xhiro vjetore deri në 8 milionë lekë.
Në një letër të hapur drejtuar krerëve të grupeve parlamentare, Konfidustria thotë se ky hap i hedhur nga qeveria, përmban rrezikun real të kalimit në gjendje të plotë anarshie të të gjithë organizimit të kategorive të biznesit shqiptar.
Në letër thuhet se, një lëvizje e tillë, e pashoqëruar me akte nënligjore, do të sjellë pasoja të rënda për zhvillimin ekonomik afatgjatë të vendit, si dhe njëkohësisht të ligjërimit të informalitetit të sotëm të lartë fiskal.
Arsyeja që jep Konfindustria është copëtimi artificial i aktivitetit tregtar të bizneseve, të ashtuquajtur “të mëdhenj”, për të kaluar si biznese të “vogla”.
Konfederata e Industrive citon edhe një sondazh pilot të zhvilluar prej saj, sipas të cilit, të paktën 1/3 e bizneseve të “mëdhenj” janë të gatshëm të copëtojnë aktivitetin e tyre tregtar, me qëllim shmangien e falimentimit.
Konfindustria vlerëson, se nga neni në fjalë do të preken drejtpërdrejt të gjithë sektorët e ekonomisë dhe sipërmarrjes së madhe të vendit, që nuk dëshirojnë dhe as nuk kanë mundësi të kryejnë copëtimin artificial të aktivitetit tregtar.
Tv Klan
