Ditën e sotme mbahet Konferenca e 27-të e Iniciativës SHBA-Karta e Adriatikut, ku të pranishëm janë presidenti Bajram Begaj dhe ministri i Mbrojtjes, Pirro Vengu. Gjatë fjalës së tij, Presidenti Begaj është shprehur se Shqipëria ka vënë në dispozicion të NATO infrastrukturën e saj ajrore, tokësore dhe detare ku përmendi edhe Bazën Ajrore të Kuçovës.
Ndër të tjera gjatë fjalës së tij Begaj u shpreh se Shqipëria e ka mbështetur dhe do të vijojë mbështetjen e Ukrainës ndaj agresionit rus.
Presidenti Begaj nuk la pa përmendur edhe Kosovën dhe përkushtimin ndaj paqes dhe sigurisë në rajon.
Bajram Begaj: Është kënaqësi për mua të jem pjesë e konferencës së 27-të të Iniciativës SHBA- Karta e Adriatikut. Konferenca mblidhet në një moment tepër delikat për sigurinë botërore. Zhvillimet e fundit tregojnë se sa me rëndësi është investimi në fushën e sigurisë dhe krijimi i platformave duke krijuar kushtet për një mjedis më të qëndrueshëm dhe të sigurtë. Në këtë kontekst suksesi i iniciativës A5 është i padiskutueshëm. Që prej themelimit të saj në 2003 si një iniciativë e A3 ajo ka dhënë një ndihmë të veçantë në procesin e anëtarësimit të vendit tonë në NATO. Bashkëpunimi ynë në kuadër të kësaj iniciative ka shërbyer si urë për ndërtimin e marrëdhënieve të forta jo vetëm mes vendeve tona, por edhe me partnerin tonë SHBA. Për Shqipërinë anëtarësimi ynë në NATO përbën një dëshmi të përkatësisë sonë në komunitetin Euroatlantik. Nuk është thjeshtë për më shumë siguri, por edhe angazhim dhe përqafim i vlerave të sanksionuara në Traktatin e Atlantikut të Veriut.
Gjatë këtyre viteve Forcat e Armatosura të Shqipërisë kanë kontribuar në misione dhe operacione të NATO-s dhe do të vazhdojnë të kontribuojnë nëse do të jetë e nevojshme. Shqipëria ka vënë në dispozicion të NATO-s infrastrukturën e saj ajrore, tokësore dhe detare. Baza ajrore e Kuçovës është tashmë funksionale ndërkohë që është ofruar edhe Porto Romano si një mundësi tjetër për aleancën. Investimi në mbrojtje është investim për më shumë siguri dhe garantim të paqes. Me rritjen e buxhetit për mbrojtje në masën 2% të Prodhimit të Përgjithashëm Bruto, Shqipëria do të vijojë rritjen cilësore të kapaciteteve të saj mbrojtëse.
Të nderuar pjesëmarrës sfida me të cilat përballemi janë të ndërlikuara dhe të shumta. Ndërkohë Ukraina përballet me një agresion të paprecedentë, të paligjshëm. Shqipëria e ka mbështetur dhe do të vijojë mbështetjen e Ukrainës. Po ashtu në Lindjen e Mesme që prej një viti kemi përshkallëzim të konfliktit duke krijuar edhe atje një vatër të nxehtë. Këto çështje madhore kërkojnë një qasje të bashkuar dhe një angazhim të përbashkët.
Rajoni ynë gjithashtu përballet me sfidat e tij specifike, veçanërisht në fushën e sigurisë pavarësisht përparimeve në dekadat e fundit rajoni ynë mbetet i ndjeshëm ndaj ndikimeve të brendshme dhe të jashtme që mund të destabilizojnë paqen. Tensionet artificialisht të krijuara qoftë etnike apo politike, ndërhyrjet e huaja dhe kërcënimet ndaj sigurisë kibernetike kërkojnë vëmendje të veçantë dhe bashkëpunim të thelluar. Historia nuk duhet harruar ndryshe rrezikojmë që të përsërisim gabimet. Unë besoj që përmes përpjekjeve të përbashkëta ne jemi në gjendje të përballemi me këto sfida.
Në këtë kontekst roli i Shqipërisë është i qartë dhe konstruktiv në rajon. Shqiptarët janë një faktor konstruktiv dhe i moderuar duke kontribuar në paqe. Ata janë dëshmuar si mbështetës të së ardhmes Europiane. Në bashkëpunim me aleatët tanë kemi punuar për të forcuar sigurinë në rajon dhe promovuar anëtarësimin e plotë të Ballkanit Perëndimor në strukturat euroatlantike
Në këtë rrugëtim është me rëndësi që të përfshihen edhe anëtarët e rinj që dëshirojnë të anëtarësohen në Iniciativën SHBA- Karta e Adriatikut dhe NATO. Anëtarësimi i Kosovës në këtë kartë është thelbësore jo vetëm për sigurinë e Kosovës, por edhe për stabilitetin e rajonit. Kosova ndonëse është shtet i ri ka treguar përkushtim ndaj paqes dhe bashkëpunimit.Të dashur miq iniciativa ka tregur ndër vite që është një instrument i fuqishëm për sigurinë e paqes dhe bashkëpunimit dhe jam i bindur se edhe në të ardhmen ajo do të vazhdojë të kontribuojë në anëtarësimin e rajonit në familjen euroatlantike.
