Ish-presidenti amerikan Donald Trump u padit me akuza penale federale për rolin e tij në ndërhyrjen në zgjedhjet presidenciale të vitit 2020, aktakuza e tretë me të cilën përballet ish-presidenti, ndërsa ai po zhvillon një tjetër fushatë për Shtëpinë e Bardhë.
Prokurori i posaçëm Jack Smith siguroi një aktakuzë në këtë rast nga një juri e madhe në Uashington, DC, duke përshkruar në mbi 45 faqe një komplot të gjerë për të përmbysur zgjedhjet presidenciale të vitit 2020, që u shënuan nga një trazirë e dhunshme në Kapitolin e SHBA më 6 janar 2021.
Trump u padit të martën me akuzat se kishte komplotuar në zgjedhje dhe u përpoq të parandalonte transferimin paqësor të pushtetit presidencial te Joe Biden.
“Qëllimi i komplotit ishte përmbysja e rezultateve legjitime të zgjedhjeve presidenciale të vitit 2020 duke përdorur mashtrime zgjedhore për të penguar funksionin e qeverisë me të cilin ato rezultate mblidhen, numërohen dhe vërtetohen”, thuhet në aktakuzë nga zyra e prokurorit special Jack Smith.
Smith e akuzoi ish-presidentin me katër pika:
-komplot për të mashtruar Shtetet e Bashkuara të Amerikës
-komplot për të penguar një procedurë zyrtare
-pengimi dhe tentimi për të penguar një procedurë zyrtare
-konspiracion kundër të drejtave të votuesve, duke iu referuar atyre që mbështetën kundërshtarin e Trump në zgjedhje, presidentin aktual Joe Biden
Ai gjithashtu vuri në dukje se hetimi është në vazhdim, duke sugjeruar që të tjerët që ndihmuan Trump mund të akuzohen për rolet e tyre në komplot.
Aktakuza, e lëshuar dje në mbrëmje, vë në dukje se ish-presidenti bashkëpunoi me gjashtë bashkëpunëtorë të paidentifikuar.
Trump akuzohet se ka rekrutuar katër avokatë, një zyrtar të Departamentit të Drejtësisë dhe një konsulent politik për të përhapur pretendime të rreme për mashtrim në zgjedhjet presidenciale të vitit 2020, duke përdorur nënpresidentin Mike Pence në një përpjekje për të penguar certifikimin e rezultateve të Kolegjit Zgjedhor, duke u përpjekur për të përdorur qeverinë amerikane të hapë hetime të rreme për krimin zgjedhor dhe të zbatojë një plan për të paraqitur fletë mashtruese votimi të zgjedhësve presidencialë.
Trump ka mohuar në mënyrë të përsëritur çdo akuzë në lidhje me veprimet e tij pas zgjedhjeve të vitit 2020, duke e cilësuar Smithin si “të korruptuar” dhe duke etiketuar hetimin si “ndërhyrje në zgjedhje”./Opinion.al
