Qeveria do të ndryshojë edhe një herë kushtet për të përfituar kompensimin e energjisë elektrike.
Bëhet fjalë për shtesën prej 648 lekë në muaj që përfitojnë familjet e pensionistëve që nga janari i vitit të kaluar, për shkak të rritjes së çmimit të energjisë.
“Panorama” ka siguruar projektvendimin, i cili favorizon dy kategori të tjera pensionistësh dhe penalizon ata që s’kanë konsum energjie.
DY KATEGORITË SHTESË
Në vendimin për kompensimin e energjisë parashikohen të bëhet tre ndryshime. Kategoria e parë që do të përfitojë kompensimin, që deri dje nuk e merrte, është ajo e pensionistëve të cilët kanë emër tjetër në librezën e dritave. Ja si ndryshon vendimi në këtë pikë: “Në rastet kur në të njëjtën familje ka dy pensionistë të vetëm dhe kontrata është në emër të pensionistit jo kryefamiljar, kompensimin e përfiton pensionisti në emër të të cilit është kontrata e energjisë”.
Ky ndryshim prek rastet kur kontrata është në emër të bashkëshortes së pensionistit. Në këto raste, edhe pse pensionisti kryefamiljar i plotësonte kushtet për kompensim energjie, ai me vendimin aktual nuk e përfiton atë. Me ndryshimin e ri, familja mund të marrë kompensim dhe ky i shkon atij/asaj që ka emrin në librezën e energjisë. Kategoria tjetër ka të bëjë me rastet kur libreza është në emër të kryefamiljarit të vdekur.
Me vendimin aktual, kompensimi nuk mund të merret, por vendimi i ri i qeverisë lehtëson këtë kategori. Ja si bëhet ndryshimi: “Në rastet kur si e ardhur e vetme e familjes është pensioni familjar dhe kontrata është në emër të kryefamiljarit pasjetues, të fëmijëve ose në emër të kryefamiljarit të vdekur, kompensimi u akordohet personave përfitues të pensionit familjar”. Ky ndryshim u jep zgjidhje përfitimi edhe pensioneve familjare, që deri sot janë të përjashtuar nga kompensimi.
KATEGORIA QË PENALIZOHET
Por vendimi i ri ka edhe një kategori që penalizohet nga kompensimi i energjisë. Bëhet fjalë pëp shtëpitë që janë në emër të pensionistëve, por janë të mbyllura, pra nuk konsumojnë energjisë.
Duke mos konsumuar nuk përfiton kompensim. Ja si e parashikon penalizimin qeveria në vendimin e ri: “Edhe nëse përfituesi plotëson kriteret e përfitimit, kompensimi nuk përfitohet nëse nuk ka konsum të energjisë elektrike dhe paguhet vetëm tarifa fikse e shërbimit”. Pra, kush nuk konsumon energji, nuk përfiton kompensimin.
KUSHTET PËR KOMPENSIM ENERGJIE
Janë disa dokumente dhe kushte që duhen plotësuar për të përfituar kompensimin e energjisë elektrike.
Sipas ISSH-së, “Dokumentet që duhet të dorëzojnë janë kopje e kontratës me Operatorin e Shpërndarjes së Energjisë në emrin e vet, kopje e librezës ose faturës së likuiduar që vërteton që e paguajnë energjinë e konsumuar, certifikatë familjare për të vërtetuar që janë kryefamiljarë të vetëm ose kanë persona të tjerë të familjes në moshë pune, si dhe një deklaratë që plotësohet pranë sporteleve të agjencive tona. Verifikimi nëse pjesëtarët e tjerë të familjes janë të papunë punëkërkues bëhet nga ana jonë zyrtarisht në zyrat e punës.”/Panorama
