Klement Çupi është një prej viktimave të tërmetit të 26 nëntorit, cili luftoi 16 orë nën rrënojat e pallatit në Thumanë për të mbijetuar, por fatkeqësisht nuk ia doli.
Çupi do të mbahet mend si simboli i rezistencës, ai arriti të komunikonte për disa orë me ekipin e kërkim-shpëtimit si dhe persona e tjerë. 34-vjeçari dhe pse ishte i plagosur rëndë buzëqështe dhe para se të humbiste jetë piu dhe një cigare nën rrënoja.
Ai u shua për shkak të gjakderdhjes, pak pasi ekipet e shpëtimit e nxorën nga rrënojat. Bashkë me të, në këtë tragjedi u shuan edhe prindërit e tij, Hajredin dhe Lutfije Çupi. I vetmi që mbijetoi ishte djali i vogël i familjes, Micoli, 31 vjeç.
Klement vetëm pak ditë më parë ishe kthyer nga Anglia, ku jetonte prej disa vitesh. Ai ishte kthyer në Shqipëri që të qëndronte për pak kohë me familjen e tij.
Ai punonte Oxford ku dhe kishte nisur të ndërtonte jetën e tij jashtë Shqipërisë, por fati i keq nuk deshi që Klementi të jetonte ende.
Lidhur me vdekjen e 34-vjeçarit ka reaguar edhe kompania në të cilën ai punonte, kompania 001 Taxis përmes rrjeteve sociale ka shprehur ngushëllime për vdekjen e të riut shqiptar.
Në këtë reagim, ndër të tjera, kompania shkruan se “Klement ishte gjithnjë duke qeshur, gjithnjë duke bërë shaka dhe e kishte zemrën flori.”
“Me hidhërim të madh duhet të njoftojmë se humbën një prej shoferëve tanë të mrekullueshëm, Klement Çupin, në tërmetin tragjik në Shqipëri. Klement ishte gjithnjë duke qeshur, gjithnjë duke bërë shaka dhe e kishte zemrën flori. Atë e donin të gjithë ata që patën fatin ta njihnin. Është një humbje e madhe për të gjithë stafin e 001, shoferët, përfshirë edhe klientët. Klementi shkoi në shtëpi në fundjavë që të kalonte kohë me familjen përpara sezonit festiv. Tragjedia i goditi teksa po flinin gjumë. Fatkeqësisht, edhe prindërit e Klementit u shuan gjithashtu”.
Për t’i ardhur në ndihmë kësaj familjeje, kompania angleze ka vënë gjithashtu në dispozicion një llogari online, për të mbledhur të ardhura, ku gjithsecili mund të kontribuojë.
“Tanimë ne po mbledhim donacione për të mbështetur pjesëtarët e tjerë të familjes, që humbën 3 prej tyre. Më poshtë keni një link ku mund të dhuroni për këtë kauzë që buron nga zemra. Duam gjithashtu të falenderojmë të gjithë shoferët dhe stafin që kanë dhuruar tashmë. Bujaria juaj ka qenë prekëse dhe familja ju është shumë mirënjohëse. Dhuroni: https://bit.ly/2OJBqUV“.
Kelment Çupi kishte emigruar drejt Oxfordit që në moshë të re. Ai kishte studiuar në këtë qytet dhe më pas kishte punuar në një lokal në Gloucester Green si menaxher. Disa vite më parë, ai kishte nisur punë si taksist për 001 Taxis./ Opinion.al
