Përmes një deklarate, Komiteti i Helsikit në Shqipëri ka vënë në pah pjesëmarrjen e ulët në votime duke shtuar se orët e fundit rënia ishte edhe më e ndjeshme.
Pas mbylljes së qendrave të votimit në orën 19:00, Komiteti deklaroi se në tërësi, situata e raportuar nga vëzhguesit e ka qenë normale dhe e qetë. Por përveç pjesëmarrjes shumë të ulët ata kanë kritikuar rastet kur votimi nuk është bërë i fshehtë por me ndihmën e familjarëve. Gjithashtu në deklaratën e tyre ata kanë shprehur se ka patur raste kur boja është mundur të fshihet çka e bën të vështirë dikë për tu identifikuar nëse ka votuar apo jo.
Për këto zgjedhje Komiteti i Helsinkit kishte të akredituar 112 vëzhgues për të monitoruar aspekte të rëndësishme të procesit parazgjedhor, të procesit të ditës së votimit dhe numërimit për Zgjedhjet e Qeverisjes Vendore.
Komiteti Shqiptar i Helsinkit, prej vitit 1996 ka monitoruar të gjitha zgjedhjet e qeverisjes vendore dhe parlamentare në vendin tonë, me qëllim për të kontribuar në ushtrimin e të drejtës së votës në mënyrë të lirë, vetjake, të fshehtë dhe të barabartë. /Opinion.al
