Deputetja e Partisë Demokratike, Jorida Tabaku, iu përgjigj kryetarit të grupit parlamentar të PS në lidhje me kërkesën e tij për ngritjen e Komisionit të Posaçëm për Dezinformimin.
Ajo u shpreh se këto komisione nuk mund të jenë të njëanshme dhe se ajo ende pret një përgjigje nga ministri Hasani në lidhje me memorandumin e firmosur me sekretarin e shtetit Blinken në shkurtin 2024.
“Kisha pritur që në këtë Komision palët të uleshin, duke pasur parasysh edhe çështjen sensitive të dizinformimit. Disa shoqata dhe organizata të shoqërisë civile, organizata të lirisë së medias, kanë ngritur shqetësime përsa i përket fushës së veprimit të këtij Komisioni.
Unë besoj që ky parlament ka pasur boll komisione qesharake, të njëanshme, të cilat nuk kanë prodhuar asgjë. Është e udhës që për këtë Komision palët të diskutojnë bashkë se cila është mënyra më e mirë, pa cënuar vijën e hollë që prek lirinë e medias, për të mos e përdorur këtë Komision për betejën politike të ditës. “u shpreh Tabaku ndërsa kërkoi që të diskutohet sepse media është e rëndësishme dhe një vijë e hollë e ndan lirinë e mediave nga uzurpimi i pushtetit të katërt.
Më tej Tabaku u shpreh se raporti i Freedom House është problematik në lidhje me median dhe lirinë e medias dhe se shumë organizata të medias dhe gazetarë kanë ngritur shqetësim në lidhje me këtë komision të posaçëm.
