Seanca e sotme plenare në Kuvend ka patur si objekt diskutimi edhe nismën e mazhorancës për ngritjen e një Komisioni të Posaçëm për raportin e Dick Martyt.
Propozuesi i kësaj nisme, deputeti Taulant Balla, tha në foltoren e Kuvendit se kjo nismë është për të dokumentuar dhe përmbledhur të gjithë rezultatet e hetimit të kryer në Shqipëri lidhur me pretendimet për krime lufte. Ai theksoi se kjo në fund do të tregojë se nuk ka pasur krime lufte nga UÇK në Shqipëri. Krim, tha Balla, ka qenë vetëm gjenocidi serb në Kosovë.
Ndër të tjera kreu i grupit parlamentar socialist tha se ky komision nuk ka lidhje me Lulzim Bashën.
“Komisioni i posaçëm nuk ka lidhje me Lulzim Bashën. Ajo që ne synojmë është që i gjithë dokumentacioni që ekziston në Shqipëri dhe ne si kërkues kemi disponuar një pjesë të dokumentacioneve dhe ndërkohë i bëj Bashës që të qetësohet. Nuk ka komision të posaçëm për hetimin e Bashës. Do ishte humbje kohë të hetosh Lulin. Luli e ka vënë vulën e vet të turpit në këtë çështje, por i takon demokratëve të cohën dhe ti kërkojnë Lulit se çfarë pozicioni dhe çfarë roli ka luajtur qoftë në gjykatën e Hagës qoftë në UMNIK. E vetmja që gjë nuk më shkon në mendje është të bëjë politik me interesin kombëtar, sqarimi në një raport gjithëpërfshirësh është në dobi të imazhit të Shqipërisë dhe përmes instrumenteve që të sqarojnë Asamblenë e Këshillit të Europës, që nuk ka pasur krime lufte dhe krime njerëzimi në Shqipëri, shqiptarët e Kosovës kanë ardhur këtu si emigrantë, nëse ka pasur krim ka qenë genocidi serb në Kosovë, kjo është e vërteta ajo që ka ndodhur dhe është detyra jonë që t’i sqarojmë”, tha Balla në Kuvend. /Opinion.al
