Kompania “Eco Construction & Partners” e Orest Sotës, biznesmenit 25-vjeçar, i arrestuar me datë 1 nëntor nga Policia e Elbasanit, pasi në makinën e tij iu gjetën 863 mijë euro dhe dy leje drejtimi në emër të ish-ministrit të Brendshëm, Saimir Tahiri, ka vetëm 2 vjet në treg.
Vepra më e madhe që ka ndërtuar është Komisariati numër 6 në Tiranë, aty ku Orest Sota shfaqet në publik në praninë e ministrit të Brendshëm të asaj kohe, Saimri Tahirit dhe drejtorit të Përgjithshëm të Policisë së Shtetit, Haki Çako.
Në faqen e internetit të kompanisë rezultojnë edhe dy ndërtime të tjera të saj. Fjalë është për një magazinë në Kolonjë dhe ndërtimin e godinës së një kompanie simotër, të quajtur “Ikona”.
Ndërtimi i Komisariatit numër 6 rezulton objekti që ka sjellë fitimet më të mëdha të 25-vjeçarit, i cili u kap në Elbasan me 863 mijë euro cash në makinë.
Nga ana tjetër, opozita shqiptare ka paralajmëruar së shpejti publikimin e disa ngjarjeve të tjera të rënda, që pritet të trazojnë seriozisht politikën dhe jo vetëm, por edhe opinionin publik shqiptar.
Kreu i PD-së, Lulzim Basha ditën e sotme, përmes një shënimi në rrjetin social Facebook, publikoi disa të dhëna që flasin për udhëtime të ndryshme të ish-ministrit Tahiri me biznesmenin Orest Sotën.
Basha tregon tre data udhëtimesh, në të cilat, 25-vjeçari ka udhëtuar së bashku me Tahirin në Itali e Mal të Zi. Në denoncimin e publikuar nga Basha, nënvizohet se në njërin nga këto udhëtime, Sota ka përdorur edhe makinën e ish-ministrit të Brenshëm, Saimir Tahiri.
Kujtojmë se makina e tipit “Audi” A8, është edhe objekt hetimi i Prokurorisë për Krimet e Rënda, për të sqaruar lidhjet mes ish-ministrit të Brendshëm dhe grupit kriminal të “Habilajve”.
