Kombëtarja mbërriti gjatë mbrëmjes të së Mërkurës në Londër, aty ku të Premten do të luajë ndeshjen e parë kualifikuese të Botërorit 2026, atë ndaj ekipit më të fortë në grup, Anglisë.
Skuadra do të qëndrojë në një hotel shumë pranë stadiumit ku do të luhet sfida me përfaqësuesen angleze për të shmangur lëvizjet e gjata. Para nisjes, paraditen e së Mërkurës, Kombëtarja zhvilloi një seancë stërvitore në Shtëpinë e Futbollit.
Mbrojtësit Marash Kumbulla dhe Ardian Ismajli u përgatitën veçmas. Kumbulla ka pasur shqetësime fizike qëkur erdhi në grumbullim, ndërsa Ismajli sapo është kthyer nga një dëmtim. Gjithsesi shpresohet që të dy të jenë të gatshëm për trajnerin Sylvinho dhe kjo masë është marrë për t’i ruajtur. Seanca zgjati rreth 1 orë e 30 minuta dhe u fokusua fillimisht te përgatitja atletike, ndërsa më pas provimi i situatave, skemave të ndryshme të lojës dhe goditjet në portë. Kuqezinjtë do të zhvillojnë të Enjten në mbrëmje dhe seancën zyrtare në stadiumin “Wembley”, ndërsa trajneri do të dalë më herët në konferencën për mediat.Ndeshja Angli-Shqipëri do të nisë në 20:45 të së Premtes dhe do të transmetohet në TV Klan. Në grupin kualifikues të kuqezinjve janë edhe Serbia, Letonia e Andorra.
