Kombëtarja kuqezi do të niset sot për në Vjenë të Austrisë, ku do të luajë nesër ndeshjen miqësore me vendësit.
Në “Happel Stadium”, në orën 17:30, kuqezinjtë e De Biazit do të nisin zyrtarisht përgatitjet për finalet e “Euro 2016”.
Sikurse dihet, Shqipëria do të jetë debutuese në një garë të tillë madhore, pas suksesit historik në Grupin I kualifikues, ku zuri vendin e dytë, pas Portugalisë, dhe u kualifikua direkt për në Europianin e këtij viti.
Kundërshtari i nesërm është mjaft i fortë, ndaj De Biazi ka menduar të ketë një qasje difensive në Vjenë, me një mesfushë të ngjeshur, me qëllim që të mos pësojë.
Natyrisht, rezultati teknik nuk ka vlera pikësh, megjithatë i shërben moralit dhe entuziasmit të lojtarëve.
Humbja, kuptohet, bën të kundërtën.
Kuqezinjtë, bashkë me delegacionin zyrtar që do t’i shoqërojë nga Shqipëria, do të vendosen në “Hilton Vienna”, i cili ndodhet në këtë adresë, në kryeqytetin austriak: “Am Stadtpark 1, 1030 Vienna, Austria”. Kjo rezidencë e përkohëshme e kombëtares sonë ndodhet buzë
Danubit, përballë “Airport Train Terminal” të qytetit. Pritet që shumë shqiptarë, nga Austria dhe vendet përreth, t’i vizitojnë heronjtë e kualifikimit në “Euro 2016”, si dhe t’i mbështesin në stadium, gjatë ndeshjes së nesërme.
Prej ditësh janë përcaktuar edhe gjyqtarët që do të drejtojnë këtë ballafaqim, me mjaft rëndësi seleksionuese e konfirmuese për ata lojtarë që do të jenë në Francë, verën e këtij viti.
Kryesor do të jetë Ivan Kružliak, nga Sllovakia, i ndihmuar nga dy bashkatdhetarë të vetët, si asistentë: Tomas Mokos dhe Ondrej Brendza. I lindur më 24 mars 1984, arbitri sllovak, Ivan Kružliak, ka drejtuar ndër të tjera, më 4 gusht 2015, ndeshjen kualifikuese të “Champions League”, Ajax Amsterdam – SK Rapid Wien (23) dhe atë të fazës së grupeve të “Europa League”, FC BaselACF Florence (22), më 26.11.2015.
