Edhe pse kërkoi lirinë për shkak të amnistisë së miratuar nga parlamenti, ish-gjyqtarja e Laçit, Parashqevi Ademi, e cila u kallëzua pas një investigimi të “Fiks Fare” dhe u dënua për korrupsion, do të mbetet në burg.
Kërkesa e Ademit është rrëzuar pak ditë më parë nga gjyqtarja e Krimeve të Rënda, Irena Gjoka, e cila pas verifikimit të fakteve dhe rrethanave ka vendosur të mos e lirojë Ademin.
Burime nga gjykata sqaruan se Parashqevi Ademi kish paraqitur kërkesën, duke argumentuar se ka mbushur moshën mbi 50 vjeç për të fituar amnistinë, por referuar ligjit, gjykata ka faktuar se kjo moshë është mbushur, pasi amnistia ka hyrë në fuqi.
Parashqevi Ademi prej disa muajsh ka humbur edhe funksionin e gjyqtares, pasi Këshilli i Lartë i Drejtësisë e shkarkoi atë kur dënimi me katër vite burg për korrupsion mori formë të prerë. Ademi u arrestua në flagrancë tetë muaj më parë, teksa në këmbim të një vendimi gjyqësor në bashkëpunim me një avokat i morën 200 mijë lekë një qytetari.
*Ne foto Parashqevi Ademi
