Pronari i një lokali dhe dy djem të rinj u arrestuan nga policia në një operacion të koduar “Butterfly”.
Në vijim të punës për goditjen e veprimtarisë kriminale në fushën e narkotikëve, bazuar në informacionet e siguruara në rrugë operative, efektivët organizuan operacionin si rezultat i të cilit u arrestuan në flagrancë shtetasit: V.K., 41 vjeç, banues në Durrës, pronari i lokalit, për veprat penale “Prodhimi dhe shitja e narkotikëve” dhe “Përshtatja e lokalit për përdorim droge” dhe L. K., 21 vjeç dhe B. I., 22 vjeç, banues në Durrës, për veprën penale “Prodhimi dhe shitja e narkotikëve”.
Gjatë kontrollit të ushtruar në lokalin në pronësi të shtetasit V. K., në Maminas, në Durrës, oficerët e policisë gjetën dhe sekuestruan në cilësinë e provës materiale një sasi lënde narkotike kokainë të ndarë në doza gati për shitje, një peshore elektronike që shërbente për peshimin e lëndës narkotike, 3 aparate celulare, 62.000 lekë të rinj, 900 euro dhe 100 paund, që dyshohen se janë përfituar nga shitja e lëndës narkotike.
Materialet u referuan në Prokurorinë pranë Gjykatës së Rrethit Gjyqësor Durrës, për veprime të mëtejshme./Opinion.al
