Vëllezërit Shkëlqim dhe Gerardo Pashja, nga Elbasani, janë drejtuesit e një organizate kriminale shqiptare që trafikonte kokainë nga Amerika e Jugut drejt Europës. Kështu thotë SPAK në një njoftim zyrtar lidhur me operacionin e zhvilluar të martën në vendin tonë dhe në Itali.
“Nën koordinimin e Prokurorisë së Posaçme kundër Korrupsionit dhe Krimit të Organizuar dhe Prokurorisë së Brescias, në orët e para të mëngjesit të 21.01.2025 u finalizua operacioni ICARO, në Shqipëri dhe Itali, me ekzekutimin e 12 masave të sigurisë “arrest me burg” dhe 8 masave “të marrjes në pyetje të personave nën hetim”. Personat ndaj të cilëve u ekzekutuan masat e sigurisë ishin pjesë e një organizate kriminale të trafikut të paligjshëm të lëndëve narkotike, kryesisht të llojit kokainë nga Amerika e Jugut”, tha SPAK.
“Oficerët e Drejtorisë së Përgjithshme të Policisë Shqiptare dhe Policisë Italiane, nën koordinimin e Drejtorisë Antimafia të Prokurorisë së Brescias dhe SPAK-ut, kryhen kontrolle të shumta në Shqipëri si edhe në provincat e Brescias, Milanos, Torinos, Veronës, Bolzanos, Cremonës, Novarës, Pavias, Trentos dhe Trevisos ku u bë e mundur dhe ekzekutimi i masave të sigurisë. Më datën 21.01.2025, në Shqipëri, janë arrestuar me qëllim ekstradimin shtetasit shqiptarë: Sh.P., I.D., E.D., E.Zh., G.B. Ndërsa arrestimi i M.M., nuk është bërë i mundur, pasi është në kërkim”.
SHQIPTARËT E ARRESTUAR
Igli Dervishi, 30 vjeç, banues në Elbasan
Shkëlqim Pashja, 44 vjeç, banues në Elbasan
Ervin Dema, 40 vjeç, banues në Elbasan
Edmond Zhuja, 41 vjeç, banues në Shkodër
Genti Berisha, 28 vjeç, banues në Tiranë
Gerardo alias Astrit Pashja, 48 vjeç
