Gazemend Tahiraj, një nga dy vëllezërit shqiptarë të arrestuar si bashkëpunëtorë në trafikun e drogës në rajonin e Venetos, është liruar. Sipas autoriteteve italiane, Tahiraj është liruar nga akuzat për bashkëpunim pas dëshmisë së vëllait të tij, Azem Tahiraj, se Gazmendi nuk kishtë asnjë dijeni për sasinë e lëndës narkotike të gjetur në restorant “La Laterna”, në pronësi të Gazmend Tahirajt.
Gjatë marrjes në pyetje, Azem Tahiraj, rrëfeu se e kishte fshehur ai vetë kokainën në restorantin e të vëllait dhe se ky i fundit nuk ka asnjë lidhje më këtë trafik.
Gazmend Tahiraj është i vetmi I liruar nga 9 të arrestuarit në operacionin e policisë italiane, që vuri në pranga edhe Atilio Violin, një nga Bosët e mafies italiane Ndragheta, mbi të cilin rëndonin një sërë akuzash si tentativë vrasje, gjobvënie dhe armëmbajtje pa leje.
Kjo bandë ishte pjesë e një rrjeti narkotrafiku ndërkombëtar, veçanërisht me Amerikën e Jugut. Vetëm në muajt e fundit ajo kishte arritur të transportonte më shumë se 400 kg kokainë, e ardhur kryesisht nga Kolumbia dhe Kosta Rika me anije.
Ndërkaq mediat italiane bëjnë të ditur se operacioni i Guardia di Finanza-s është konkretizuar falë një agjenti të infiltruar, që është prezantuar si klient i interesuar në këtë trafik. /tvklan/
