Ambasada e Shteteve të Bashkuara në Tiranë ka reaguar pasi Kuvendi miratoi sot ndryshimet në Kodin Zgjedhor.
Në një deklaratë zyrtare, ambasada i cilëson ndryshimet e miratuara si një shtesë dhe jo shkelje të marrëveshjes së 5 qershorit por nga ana tjetër thekson se shumica qeverisëse dështoi të respektonte përkushtimin e deklaruar nga ajo vetë për të kërkuara emërues të përbashkët në Këshillin Politik.
“Shtetet e Bashkuara i kanë shtyrë udhëheqësit e Shqipërisë – brenda dhe jashtë parlamentit – për t’u angazhuar me njëri tjetrin në mënyrë transparente dhe përfshirëse për çështje me rëndësi kombëtare. Ky lloj angazhimi pozitiv prodhoi marrëveshjen e 5 qershorit për reformën zgjedhore. Nga ajo kohë, kemi bërë të qartë që marrëveshja e 5 qershorit duhet të respektohet dhe se çfarëdo masash shtesë duhen shqyrtuar dhe miratuar në mënyrë të ngjashme transparente dhe përfshirëse në Këshillin Politik. Sot, partia qeverisëse ndaloi diskutimet në Këshillin Politik dhe votoi për të miratuar ndryshime domethënëse të rregullave që do të qeverisin zgjedhjet e 25 prillit. Ndërkohë që ishte brenda kompetencave të parlamentit për t’i miratuar këto ndryshime, dhe ndërkohë që këto ndryshime janë shtesë – dhe jo shkelje – të marrëveshjes së 5 qershorit, është për të ardhur keq që shumica dështoi të respektonte përkushtimin e deklaruar prej vetë asaj për të kërkuar emërues të përbashkët në Këshillin Politik. Shqipëria është anëtare e NATO-s, aspiruese për anëtarësim në Bashkimin Europian, dhe Kryesuese e radhës e OSBE-së. Është detyrë e udhëheqësve të Shqipërisë – duke filluar por jo vetëm ata në pushtet – për të kërkuar nga vetja një standard më të lartë dhe për të siguruar lirinë dhe ndershmërinë e zgjedhjeve të ardhshme. Këtë pritshmëri e kemi ashtu si populli shqiptar.”, shkruan ambasada në faqen zyrtare në Facebook.
LEXO EDHE: Miratohen ndryshimet në Kodin Zgjedhor
Kuvendi miratoi sot ndryshimet e Kodit Zgjedhor me 97 vota pro, 15 kundër dhe 5 absrenim. Në ndryshime parashikohet ndalimi i koalicioneve parazgjedhore, pragu elektoral 1% si dhe lista të hapura. Kandidatët do të mund të ndryshojnë renditjen vetëm nëse arrijnë të marrin minimumi sa herësi i dalë prej pjestimit të totalit të votave të partisë në një qark me numrin e mandateve të fituara. /Opinion.al
