Ish-kryeministri Sali Berisha ka zbardhur detaje të tjera lidhur me marrëveshjen për koalicion me LSI për zgjedhjet e 6 marsit në 6 bashki të vendit.
Gjatë një interviste në “Syri TV”, Berisha thotë se është takuar edhe vet me Presidentit Ilir Meta për çështjen e e koalicionit edhe pse thekson se marrëveshja mes Komisionit të Rithemelimit dhe LSI do të nënshkruhet nga deputeti Flamur Noka dhe Sekretari i Përgjithshëm i LSI. Ish-kryeministri thotë se është takuar dhe me krerët e tjerë të partive aleate me PD.
“Forcat opozitare janë dhe mbeten aleatë pavarësisht marrin apo nuk marrin pjesë në këto zgjedhje. Por oportunitetet politike janë oportunitete dhe ata zgjedhin të mos investojnë në këto 6 bashki. Në fakt nëse unë jam takuar me ta dhe kam zhvilluar takime, Lul Bravën ata nuk e takojnë. Nuk janë pjesë e koalicionit, ata kanë adaptuar këtë qëllim që ne do ja lëmë degëve lokale për cilin kandidat do mbështesin. Kanë vendosur të mos hyjnë në zgjedhje, të mos maten me këtë proces. Por kjo nuk do të thotë që degët lokale nuk do të mbështesin kandidatët që preferojnë. Marrëveshjen me LSI-në e firmosi zoti Flamur Noka nga ana jonë dhe Sekretarit i Përgjithshëm i LSI-së, do jenë gjithashtu në koalicion edhe Demokristianët dhe Kristiandemokratët. Kemi zhvilluar bisedime në të gjitha nivelet. Edhe unë kam marrë pjesë në bisedime me zotin Meta. Jo detaje të marrëveshjes, por unë e kam deklaruar që jam për koalicion me LSI-në dhe ka gjetur një mirëkuptim. Marrëveshja nuk është negociuar as nga unë as nga zoti Meta. Unë e kam takuar zotin Meta dhe kam takuar të gjithë kryetarët e partive opozitore, përveç zotit Dule, i cili ndodhej jashtë shtetit, por kam komunikuar në telefon dhe me të. Unë kam deklaruar se jam me zotin Meta”,-tha Berisha./ Opinion.al
