Juristi Plarent Ndreca (ish zëvendës ministër) dhe sekretari ligjor i Partisë Demokratike, Çlirim Gjata, janë përplasur këtë të mërkurë në emisionin Opinion, lidhur me diskutimin nëse kryebashkiakët aktualë duhet t’i lënë vendin të zgjedhurve të rinj. Gjata në debat e sipër i kujtoi juristit për kallëzimin e KLSH-së.
Plarent Ndreca: Kështu e kanë politikën këta, këta vijnë për t’u zënë, për të bërë grusht edhe për të hedhur molotov. Unë s’e kam kështu. E transmeton në studio ai.
Çlirim Gjata: Këta politikën e kanë të vjedhin 812 mijë Euro. Ia ka nxjerrë Kontrolli i Lartë i Shtetit. Kur vjedh 812 mijë Euro, normal që vjen këtu të mbrosh sepse je peng.
Blendi Fevziu: E ke me Ndrecën ti këtë?
Çlirim Gjata: Po po po, e ka nxjerrë KLSH që ka abuzuar 812 mijë Euro.
Plarent Ndreca: Po ça thu mo. Mos ja fut kot.
Çlirim Gjata: Po kështu është kur s’ka Prokurori.
Plarent Ndreca: Mos ta kthejmë personale, se po e kthyem personale nuk dihet ku del kjo histori.
Çlirim Gjata: Hajde dalim ku të duash.
Por nuk ka mbaruar me kaq… Plarent Ndreca dha se do ta çonte juristin e PD-së në gjykatë, me akuzën e shpifjes.
Plarent Ndreca: E ftoj zotërinë nesër në gjykatë, e ftoj ta provoj këtë gjënë. Nëse ai provon, unë kam qenë një herë nën hetim nga prokuroria. Unë nesër marrë atë cd e emisionit dhe shkoj në gjykatë. Dhe nëse ti arrin të provosh…
Çlirim Gjata: Prokuroria nuk e merr nën hetim se e kanë këta. Këtë çështje e ka nxjerrë KLSH dhe prokuroria nuk e heton se e kanë këta. Pse se heton prokuroria këtë?
Plarent Ndreca: Ç’ke ti pse mërzitesh…
Çlirim Gjata: Po të ketë prokurori të merr ty…
Plarent Ndreca: Ore nuk më intimidon dot as ti as 10 si ti. Kam kaluar si puna jote pa fund. KLSH bën 1 mijë kallëzim, për kë i teket atyre. Ka bërë kallëzim dhe organi që e verifikon këtë është prokuroria dhe jo çështja është pushuar me një hetim të formës së prerë./ Opinion.al
