Këshilli i Lartë i Prokurorisë nis intervistat me 22 kandidatët për prokurorinë e Posaçme Anti-Korrupsion, apo siç njihet SPAK. Intervistimi i të gjithë kandidatëve parashikohet të zgjasë për 5 ditë.
Intervistat e 4 prokurorëve të parë u zhvilluan me dyer të mbyllura dhe pa praninë e mediave.
Kreu i KLP-së, Gent Ibrahimi tha për gazetarët në fund të procesit, se të gjitha intervistat janë regjistruar me audio dhe me video, por nuk do të bëhen publike. Sipas tij, regjistrimet e intervistave janë pjesë e procesit administrativ që do të përdoren në rastet kur kandidatët apelojnë vendimin e Këshillit të Lartë të Prokurorisë.
Ibrahimi shpjegoi se zhvillimi i intervistave me dyer të mbyllura ishte një mundësi e mirë për kandidatët për SPAK që të japim maksimumin dhe të mos ndikohen nga emocionet e zhvillimit të intervistës publikisht.
Ndërkohë që KLP zhvillon intervista me kandidatët për SPAK, një pjesë e këtyre prokurorëve janë paralelisht në proces Vettingu. Kreu i KLP u shpreh se mund të ndodhë që Këshilli i Lartë i Prokurorisë dhe Komisioni i Pavarur i Kualifikimit të dalin me rezultate të ndryshme për integritetin e një kandidati për SPAK.
“Ky proces synon të verifikojë profesionalizmin e kandidatëve. Ekziston mundësia që procesi të arrijë në rezultate të kundërta. Kam besimin që në përgjithësi këto dy procese do shpien drejt rezultateve të njëjta”./ Opinion.al
