Vëllai e deputetit socialist Parid Cara është përfitues i 80 hektarëve toke shtetërore në Paskuqan. Vendimi është marrë në Maj të këtij viti nga Qeveria. Aty është përcaktuar se 80 hektarë tokë, do i kalojnë për administrim kompanisë “Vebo Invest” me qëllimin ndërtimin e një varreze private.
Në kompaninë “Vebo Invest” rezultojnë bashkëpronarë dy shtetas italianë së bashku me vëllain e deputetit socialist të Kavajës Parid Cara, shtetasi Besim Cara.
Me firmën e kreut të Qeverisë, Edi Rama, është autorizuar Ministria e Zhvillimit Urban e drejtuar nga Eglantina Gjermeni, për të lidhur kontratën me këtë kompani.
“Duket se ka qenë kompania private ajo që ka bërë kërkesën tek Ministria e Zhvillimit Urban për shfrytëzimin e 80 hektarëve tokë në Paskuqan për ndërtimin e varrezës private. Më pas ministria ka ndryshuar ligjin “Për Shërbimin Publik të Varrezave” ku me ligj është dhënë hapësira për operimin e kompanive private në këtë shërbim. Më pas ministria i ka kërkuar leje në Këshillit të Ministrave për të lidhur kontratë me kompaninë e vëllait të deputetit socialist Parid Cara”. Kështu shkruhet në portalin “Hashtag” i cili ka publikuar fillimisht këtë lajm.
Në ndryshimet ligjore që ka bërë qeveria në ligjin “Për Shërbimin Publik të Varrezave” këto lloj kontratash nuk konsiderohen si koncesione, por si kontrata ekskluzive, madje ky ligj përcakton se këto kontrata mund të përfitohen pa garë dhe pa tender.
Pas publikimit të këtij lajmi në ‘Hashtag’ dhe më pas në një sërë mediash të tjera, ende nuk ka asnjë sqarim nga Qeveria, nëse vertet është favorizuar vëllai i deputetit Cara.
Në foto, Parid Cara, Elvis Roshi
