Është shkarkuar nga detyra gjyqtarja Enkelejda Hoxha. Këshilli i Lartë Gjyqësor vendosi të pranojë sot kërkesën e Inspektorit të Lartë të Drejtësisë për masën disiplinore shkarkim nga detyra për magjistraten Enkelejda Hoxha, gjyqtare pranë Gjykatës së Rrethit Gjyqësor Krujë.
Ka qenë kryetarja Naureda Llagami, e cila njoftoi vendimin, sipas të cilit KLGJ, vendosi shkarkimin nga detyra të magjistrates. Në seancën e paraqitjes së përfundimeve mbi hetimin e kryer, Inspektori i Lartë i Drejtësisë Artur Metani kishte argumentuar shkeljet disiplinore të magjistrates, si mospërmbushje e pajustifikuar e funksioneve gjatë gjykimit, veprime që kanë sjellë përfitim të padrejtë për palët, mosrespektim të rëndë e të vazhduar të legjislacionit material e procedural penal dhe nxjerrje të akteve (vendimeve) të paarsyetuara.
Kujtojmë se emri i Enkelejda Hoxhës lidhet me lirimin nga burgu, të disa të dënuarve me burgim të përjetshëm si anëtari i bandës së Durrësit, Endrit Dokle. Po ashtu Hoxha ka liruar nga burgu Genc Tafilin, i dënuar për vrasjen e komisarit të Policisë Arben Zylyftari, Ilir Pajën, të cilit i kishte mbetur mbi një vit dënim, si dhe Hekuran Billën.
Ndërkohë gjyqtarja Hoxha akuzohet se është përfshirë në një skemë korruptive në Gjykatën e Krujës.
Bashkë me 9 persona të tjerë kishin ngritur një skemë përmes të cilës ulnin dënimet ose lironin nga burgu të dënuar për vepra të rënda penale. Mes të arrestuarve janë, avokati Aldo Tabaku si edhe sekretarja e Gjykatës së Krujës, Manuela Mallakuçi./Opinion.al
