Shtatë persona të tjerë u arrestuan për trafik të lëndëve narkotike në kuadër të një procedimi të nisur prej vitit 2013.
Sipas një njoftimi zyrtar të Policisë së Shtetit, të arrestuarit janë pjesë e një bande kriminale që trafikonte drogën drejt Greqisë dhe Italisë.
Lënda narkotike kryesisht sigurohej në Lazarat dhe në malësinë e Vlorës. Më pas transportohej me mushka, grumbullohej në zonën e pyllëzuar të Delvinës ose në shtëpi të pa banuara dhe trafikohej jashtë vendit, në disa raste përmes malit me mushka.
Në kuadër të operacionit të koduar “Quaranta” u vunë në pranga për akuzën e trafikut ndërkombëtar të drogës këta persona:
Petro (Abedin) Kuci, 47 vjeç, banues në Stiar, Delvinë. (Organizator).
Arben Kanina, 44 vjeç, banues në Delvinë. (Organizator).
Mirel Ademi, 31 vjeç, banues në Delvinë. (Transportues).
Artur Shukulli, 42 vjeç, banues në Delvinë. (Transportues).
Donald (Qosja) Shandro, 36 vjeç, banues në Lushnje. (Organizator).
Bledar Murati, 29 vjeç, banues në Durrës. (Transportues).
Xhovan Saraçi, 30 vjeç, banues në Durrës. (Transportues).
Burime thonë se një nga personat e arrestuar është kushëriri i ish-drejtorit të Transporteve në qytetin e Sarandës Klement Balili.
Ky i fundit ndodhet në arrati pasi është shpallur në kërkim nga policia për trafik ndërkombëtar të lëndës narkotike.
Të njëjtat burime saktësuan se Balili nuk është pjesë e grupit që po hetohej prej vitit 2013, por e një tjetër bande që trafikon drogën në Greqi dhe Belgjikë.
Po ashtu, nedhe emri i operacionit të koduar ‘Quaranta” nuk është rastësi, pasi Klemend Balili është pronar i kompleksit “Santa Quaranta” në Sarandë. Nuk dihet nëse edhe kushëri i tij është bashkëpronar në këtë kompleks, apo nëse emri i koduar “Quaranta” është vënë vetëm për shkak të lidhjeve të tyre të gjakut.
Procedimi penal është regjistruar pranë Prokurorisë për Krime të Rënda në shtator të vitit 2013.
Hetimi ka pasur një shtrirje kohore rreth tre vjeçare, kohë gjatë së cilës janë sekuestruar në vendin tonë dhe në Zvicër në disa raste: 85 kg e 900 gr lëndë narkotike e llojit kanabis sativa, në datën 05.10.2013, në Tiranë.
670.135 kg lëndë narkotike e llojit kanabis sativa në datën 29.04.2014, në Sarandë, në Pyllin e Gështenjave në afërsi te vendit të quajtur Bushnec.
60 gram lëndë narkotike e llojit Kokainë, në datën 06.06.2014, në Kavajë dhe Fier 6 kg e 900 gr lëndë narkotike e llojit Heroinë, gjatë viteve 2013 dhe 2014 në Zvicër.
1.5kg lëndë narkotike e llojit Kokainë, në Zvicër gjatë vitit 2014.
Në kuadër të këtij procedimi janë arrestuar gjithsej në vendin tonë dhe në Zvicër 16 shtetas, nga të cilët 3 në Zvicër dhe 13 në vendin tonë. Shtetasit e arrestuar në vendin tonë ishin pjesë e tre grupeve kriminale që operonin në Tiranë, Durrës, Fier, Gjirokastër dhe Sarandë.
