Politikanët dalin sërish fitues përballë popullit dhe të kaluarës së tyre. Në mungesë edhe të vëmendjes së gazetarëve, Kuvendi i Shqipërisë ka hartuar dhe ka miratuar për procesin e dekriminalizimit një formular me “hile” brenda.
Zyrtarët e shtetit u janë përgjigjur disa pyetjeve lidhur me faktin nëse kanë qenë apo jo të arrestuar apo të dënuar nga gjykatat shqiptare dhe të huaja. Deri këtu çdo gjë është në rregull, por kleçka qëndron në pyetjen nëse ndaj tyre ka pasur ndonjëherë hetime, raporton Newsbomb.al.
“A keni qenë ndonjëherë në hetim ose gjykim nga një autoritet i huaj, për kryerjen e një vepre penale?”. Pyetja në këtë rast ỗet vetëm për hetim nga një autoritet i huaj, pra duke përjashtuar në mënyrë absurde gjykatat shqiptare.
Kjo mënyrë formulimi bie ndesh gjithashtu me pyetjet e tjera, për sa kohë zyrtarëve u është kërkuar të deklarohen për dënimet nga gjykatat shqiptare. Llogjikisht dhe ligjërisht, përpara vendimit të gjykatës, duhet të nisë fillimisht hetim nga prokuroria.
Nëpërmjet kësaj manovre, politikanëve nuk u kërkohet të deklarohen për hetimet që janë kryer ndaj tyre në Shqipëri dhe këta në fakt nuk janë pak. Mjafton të përmendim vetëm tre liderët e partive kryesore, Edi Ramën, Lulzim Bashën dhe Ilir Metën, ndaj të cilëve ka pasur hetime nga Prokuroria përgjatë viteve që ata kanë drejtuar institucione të rëndësishme të vendit.
Si përfundim, dekriminalizimi nuk do të prekë “të fortët” e vërtetë të politikës shqiptare, ndërsa mbetet të shpresojmë që edhe reforma në drejtësi të mos përfundojë në të njejtën mënyrë.
