Presidenti gjerman Frank-Walter Steinmeier mbajti një fjalim të pazakontë televiziv ku iu drejtua popullit të tij duke thënë se kjo situatë është një sprovë për njerëzimin.
Presidenti në Gjermani nuk i ishte drejtuar popullit me një fjalim as kur ra Muri i Berlinit. Por të shtunën Steinmeier iu drejtua për herë të parë gjermanëve me një mesazh pëmrmes televizionit, përveç atyre që mbahen për Krishtlindje.
Ai kundërshtoi pikëpamjen se kjo është një luftë duke shtuar kjo është në fakt një sprovë për njerëzimin.
“Jo, kjo pandemi nuk është luftë. Kombet nuk luftojnë kundër kombeve dhe as ushtarët kundër ushtarëve. Përkundrazi, është një sprovë për njerëzimin. Ajo nxjerr më të mirën dhe më të keqen tek njerëzit. Le t’i tregojmë njëri-tjetrit më të mirat. T’ia tregojmë Europës. Gjermania nuk mund të dalë nga kjo krizë e fortë dhe e shëndetshme nëse fqinjët tanë nuk janë të fortë dhe të shëndetshëm“, tha ai.
Presidenti gjerman bëri thirrje për solidaritet edhe në të ardhmen pasi vlerësoi se shoqëria do të ndryshojë pas kësaj krize.
“Ne nuk duam të bëhemi një shoqëri nën ankth dhe mosbesim. Ne mund të jemi një shoqëri me më shumë besim, më shumë konsideratë dhe më shumë vetëbesim,” tha ai.
Steinmeier gjithashtu u bëri thirrje individëve që të zbatojnë masat e vendosura për të parandaluar përhapjen e virusit.
“Si do të vazhdojnë gjërat dhe kur dhe si kufizimet mund të qetësohen, nuk do të vendosen vetëm nga politikanët por edhe ekspertët”, shtoi ai. /Opinion.al
