Teksa Londrën e kanë pushtuar ethet e dasmës mbretërore, e cila do të zhvillohet së shpejti, ekziston një person i cili nuk e dëshiron këtë dasmë. Bëhet fjalë pikërisht për vëllain e nuses Meghan Markle, i cili është shprehur kundër këtij eventi. Me anë të një letre publike drejtuar princit Herry, ai i bën thirrje kunatit të tij të mos martohet.
Thomas Markle Jr ka kritikuar gjysmë motrën e tij për marrëdhënien që ajo ka me të atin, duke e konsideruar një njeri të keq. Në letrën drejtuar Herry-t 51 vjeçari shkruan:
“Sa më shumë afrohet dita e dasmës tuaj, aq më e qartë bëhet, se ky është gabimi më i madh në historinë e dasmave mbretërore”.
Thomas ka kritikuar ashpër marrëdhënien e Meghan me të atin, dhe faktin që ajo nuk ka ftuar në dasmë asnjë prej familjarëve por në vend të tyre qindra persona të cilët nuk i njeh fare. Ai e ka konsideruar një mendjemadhe motrën e tij të vogël, të cilën fama e ka shndërruar në një njeri negativ, dhe në fund të ditës sipas tij Meghan do tallet me rregullat e familjes mbretërore.
Ai gjithashtu e ka quajtur motrën e tij të shtirur dhe nuk ka lënë fjalë pa thënë për të. Se si Meghan i ka përjetuar këto akuza nuk dihet, por sigurisht që nuk i ka ardhur aspak mirë./Opinion.al
