I ftuar në emisionin “Opinion”, mbrëmjen e së enjtes ka qenë, Kita Sallabanda, mjek i shquar neurokirurg në Spanjë, i njohur për këshillat që ka dhënë për qytetarët gjatë pandemisë së Covid-19.
Në një intervistë me gazetarin Blendi Fevziu, Kita Sallabanda rrëfeu se si nisi karrierën e tij fillimisht në Shqipëri e më pas u largua drejt Spanjës.
Ai thotë se u largua përfundimisht nga Shqipëria në vitin 2000 për në Madrit, ku fillimisht punoi si ndihmës kirurg ndërsa tashmë ka hapur institutin e tij ku jep edhe mësim.
Pjesë nga intervista
Blendi Fevziu: Në cilin vit u largove nga Shqipëria?
Kita Sallabanda: Unë kam dy periudha largimi. Bëra specializimin nga ’89 në ’94 në Barcelonë. Pastaj u ktheva në ’94 në Shqipëri deri në vitin 2000 ku punova në klinikën e neurokirurgjisë këtu në Spitalin Nr.5 dhe në 2000 ika definitivisht.
Blendi Fevziu: Dhe prej 23 vitesh punoni në Madrid të Spanjës?
Kita Sallabanda: Po.
Blendi Fevziu: Si u gjendët në Madrid më pas? E patët më të thjeshtë pas specializimit që kishit bërë në Barcelonë?
Kita Sallabanda: Dua të sqaroj që nëna ime është spanjolle. Është një nga 4 spanjollet që kanë qenë në Shqipëri vite përpara dhe unë kisha marrë nënshtetësinë spanjolle që në vitin 1992 dhe pastaj vendosa të kthehesha në Spanjë në vitin 2000 sepse për gjithë atë situatën e rrëmujshme që ishte në Shqipëri, gruaja me vajzën kishin vajtur përpara në Spanjë dhe Madridi është qytet më i hapur. Kishte më tepër mundësi, vajtëm në Madrid dhe unë fillova të punoja atje.
Blendi Fevziu: Fillove direkt në spital?
Kita Sallabanda: Fillova si ndihmës. Karriera ime nuk ka qenë e lehtë. Unë punova gati 8 vjet si ndihmës neurokirurg megjithëse isha neurokirurg i afirmuar në Shqipëri. Punova gati 8 vjet dhe pastaj dhashë provimin e neurokirurgjisë që ishte ajo që ndryshoi jetën time sepse pas dhënies së provimit të neurokirurgjisë u futa në një spital universitar, u paraqita në konkurs, kam fituar 3 herë konkursin, kam qenë i pari në të profesorit të asociuar dhe tani po akreditohem për profesor titullar.
Blendi Fevziu: Tani jepni dhe mësim në universitet apo jo?
Kita Sallabanda: Po. Deri Nëntorin e këtij viti kam dhënë mësimin e fundit. Kam kaluar dhe kam krijuar një institutin tim, institutin e radiokirurgjisë së avancuar, atje do bëj edhe mësimdhënie.
