Katër të rinj shqiptarë të cilët kishin hyrë ilegalisht në Mbretërinë e Bashkuar janë burgosur pasi u kapën duke punuar në një fermë kanabisi të ndërtuar në një hotel të braktisur në Aboyne.
Sipas mediave të huaja, në gjykatë u tha se punonin si “kopshtarë” për të kultivuar drogë për të shlyer borxhet ndaj bandave të krimit të organizuar.
Gazeta skoceze The Press and Journal, ka bërë të ditur emrat e shqiptarëve të dyshuar për këtë veprimtari kriminale: Fabio Marku, 28 vjeç, Arjel Leshi, 24, Gelvis Xhepa, 26 vjeç dhe Donald Xhepa, 29 vjeç.
Të 4 shqiptarët u arrestuan prej 16 janar të këtij viti kur dhe u zbulua ferma e kanabisit, prodhimi i së cilës nëse do të hidhej në treg kapte vlerën e 400 mjijë paund.
Policia konfirmoi se nuk bëhej fjalë për trafik njerëzor dhe se të katër burrat zgjodhën të punonin në fermën e kanabisit me vullnetin e tyre të lirë.
Operacioni i paligjshëm u zbulua nga një arkitekt i cili kishte shkuar për të kryer disa punime në hotelin e braktisur. Ai kishte zbuluar se bravat e godinës ishin ndërruar dhe më pas kishte parë dhe bimë kanabisi. Menjëherë kishte njoftuar policinë e cila kishte gjetur shqiptarët në një nga dhomat e hotelit me 50 dhoma gjumi.
Avokati mbrojtjës i Fabio Markut i tha gjykatës se klienti i tij kishte hyrë ilegalisht dhe se kur i ishte ofruar punësimi në Skoci kishte një borxh prej 15 mijë eurosh.
“Për shkak të situatës në të cilën u gjend, ai e pranoi atë mundësi punësimi,” tha Patrick Brelhany.
Tre të arrestuarit e tjerë nuk kishin asgjë për të thënë në atë kohë. Të dy prej tyre u deklaruan fajtorë për një akuzë të vetme, shpërndarje e lëndëve narkotike.
520 bimët e vogla narkotike arrinin vlerën 220 deri në 810 £ secila në tregun e zi. Së bashku ato mund të shkonin në një vlerë 114,400 deri në 421,200 £ në maturim të plotë.
Më 17 janar të këtij viti, Gjykata dënoi secilin nga katër burrat me dy vjet burg./Opinion.al
