Kina vazhdon të furnizojë Rusinë me dronë të vegjël komercialë që po ndihmojnë forcat e Kremlinit në luftën kundër Ukrainës.
Burime të inteligjencës perëndimore e zbulojnë këto të dhëna për Wall Street Journal.
Sipas gazetës, Pentagoni ka frikë se dronët jo vetëm që po ndihmojnë Moskën në konflikt, por po lejojnë Pekinin të mbledhë të dhëna tepër të rëndësishme në fushën e betejës.
Nga Arabia Saudite në Mianmar dhe Iraku në Etiopi, gjithnjë e më shumë ushtri në mbarë botën po grumbullojnë dronë luftarakë kinezë dhe i vendosin në fushën e betejës.
Në Irak, autoritetet thonë se kanë përdorur dronë kinezë për të kryer më shumë se 260 sulme ajrore kundër objektivave të ISIL që nga mesi i vitit 2018, me një shkallë suksesi prej gati 100 për qind.
Në Mianmar, ushtria, e armatosur me dronë kinezë, ka kryer qindra sulme ajrore ndaj civilëve dhe grupeve të armatosura etnike që kërkuan rrëmbimin pushtetit të saj dy vjet më parë.
Ndërkohë në Etiopi, flota e kryeministrit Abiy Ahmed me dronët kinezë, iranianë dhe turq ishte thelbësore në ndihmën e forcave të tij për të penguar një marshim rebel në vitin 2021 që kërcënoi të përmbyste qeverinë e tij.
Blerës të tjerë të dronëve luftarakë të Kinës, avionë që, përveç mbledhjes së inteligjencës, mund të gjuajnë edhe raketa ajër-tokë, përfshijnë Marokun, Egjiptin, Algjerinë, Emiratet e Bashkuara Arabe, Pakistanin dhe Serbinë.
