Kina ka paralajmëruar SHBA-në se është gati të luftojë çdo lloj lufte pasi u godit nga tarifat tregtare të Presidentit Donald Trump.
Dy ekonomitë më të mëdha botërore janë pranë një lufte tregtare pasi Trump vendosi më shumë tarifa mbi mallrat kineze.
Kina iu përgjigj me reciprocitet duke vendosur tarifa 10-15% mbi produktet bujqësore amerikane.
“Nëse SHBA-ja do luftë, qoftë luftë tarifash, luftë tregtare apo çdo lloj tjetër lufte ne jemi gati të luftojmë deri në fund”, tha ambasada kineze në rrjetin social X duke cituar një deklaratë të qeverisë të martën.
Kjo është një nga retorikat më të forta që ka përdorur Kina që prej ditës që Trump u bë president dhe kjo ndodhi teksa udhëheqësit e saj ishin mbledhur në Pekin për Kongresin Kombëtar Popullor.
Kryeministri i Kinës, Li Qiang njoftoi se Pekini zyrtar do të rrisë shpenzimet në mbrojtje me 7.2% këtë vit dhe paralajmëroi se “ndryshimet e papara në një shekull po shpalosen në mbarë botën me një ritëm të shpejtë”. Kjo rritje në fakt ishte e pritshme dhe përputhet me shifrën e shpallur vitin e kaluar.
Udhëheqësit kinezë po përpiqen t’i dërgojnë një mesazh popullit se janë besimplotë që ekonomia e tyre mund të rritet edhe nëse ndodh një luftë tregtare.
