Kina po përballet me një situatë tepër alarmante për shkak të koronavirusit. Përpos panikut, zemërimi mbarëpopullor ndaj qeverisë sa vjen e rritet. Kjo lidhet kryesisht me censurimin e fjalës së lirë dhe ndërgjegjësimit publik lidhur me situatën reale të virusit.
Fillimisht zemërim shkaktoi vdekja e doktorit Li Wenliang. 34-vjeçari ishte i pari që paralajmëroi për pasojat vdekjeprurëse të virusit, por u detyrua të heshte nga autoritetet.
Po ashtu, Chen Qiushi, një gazetar që ka raportuar me kritika të forta nga Wuhani, qyteti epiqendër i shpërndarjes së koronavirusit, u shpall i zhdukur të enjten. Kjo mobilizoi qindra mijëra qytetarë të Kinës të kërkonin të drejtën e fjalës me fushata sensibilizimi në internet.
Mijëra qytetarë kërkuan gjetjen dhe lirimin e tij duke përdorur rrjetin social Weibo, ndërsa shpresojnë që ai të ketë marrë një trajtim të kujdesshëm dhe të drejtë, pa dhunë psikologjike apo fizike.
“Ne nuk mund të përballojmë një Li Wenliang të dytë”, shkruanin ndjekësit.
Thirrja u dëgjua menjëherë nga qeveria e Kinës, që censuroi dhe hashtagun për këtë problem./Opinion.al
