Tre muaj pas raportimit të rasteve të para të koronavirusit, Hong Kongu dhe Koreja e Jugut po i tregojnë shoqërive në të gjithë botën, se ka dritë në fund të tunelit.
Hong Kong të hënën nuk raportoi asnjë infeksion të ri me koronavirus, për herë të parë në gati dy muaj, ndërsa Koreja e Jugut njoftoi të dielën se kishte arritur në një nivel prej vetëm tetë infeksione të reja. Seuli ka thënë se ndërsa fushata e saj për distancimin shoqëror do të mbetet në vend deri në 5 maj, Koreja do të fillojë të lehtësojë kufizimet në godinat sportive dhe mbledhjet publike përfshirë shërbimet kishtare.
Një studim i Universitetit të Hong Kong-ut, që arriti në përfundimin se kufizimet në qytetin kinez ishte të mjaftueshme për ngadalësimin e përhapjes së virusit, ka bërë që disa ekspertë të sugjerojnë disa kufizime që së shpejti mund të hiqen.
Ditën e hënë, Hong Kong kishte numëruar 1.023 raste të konfirmuara të Covid-19 dhe katër vdekje që kur infeksioni i parë u raportua në 23 janar. Totali për Korenë e Jugut, pas raportimit të 13 rasteve të reja të hënën, qëndron në 10,647 raste të konfirmuara dhe 236 vdekje.
Ironia qëndron në faktin që në fillim, të dy qeveritë ishin përballur me kritika të ashpra për trajtimin e krizës. Deri tani të dy vendet po përballin sukses pa nevojën e bllokimeve të rënda që shihen në të gjithë globin .
Për shembull, në Francë, një vend ku dhe motoja kombëtare është “Liberté”- Liri, qytetarët kanë nevojë për leje për të dalë nga shtëpitë e tyre; ndërsa në Hong Kong dhe në Korenë e Jugut, njerëzit janë të lirë të ecin rrugëve dhe madje edhe të hanë nëpër restorante, megjithëse me disa kufizime në distancë.
Duke vënë në dukje këtë, disa kritikë perëndimorë që kanë qënë të pakënaqur nga përgjigjet e qeverive të tyre, kanë marrë përvojat e Hong Kongut dhe të Koresë së Jugut, si shembuj se si veprimet e shpejta qeveritare të organizuara mirë me regjimet e testimit, kanë mohuar nevojën për veprime më të ashpra, që mund të rezultojnë në rënie ekonomike. Por ndërsa veprimi i shpejtë i qeverisë, gjurmimi i të infektuarve dhe regjimet e organizuara mirë të testimit padyshim që kanë luajtur një rol, vëzhguesit gjithnjë e më shumë po sugjerojnë se ekziston një shtyllë tjetër suksesi: mendjet dhe sjelljet e qytetarëve.
Fuqia e njerëzve
Qytetarët koreanë dhe kinezë filluan të mbajnë maska dhe të marrin masa të tjera paraprake, para se të lëshohej ndonjë udhëzim zyrtar nga qeveritë e tyre. Vende si SH.B.A. nuk praktikuan distancim shoqëror derisa situata u bë mjaft e rëndë për vëmendjen e gjerë të publikut. Në Itali, ishte fushata “Milano nuk ndalet”, e cila inkurajoi baret të mbeten të hapura, ndërsa në Presidentin i SHBA, vazhdimisht deklaroi se vendi i tij nuk ishte “ndërtuar për t’u mbyllur”.
Të gatshëm të sakrifikojnë
Muajin e kaluar një studim nga Shkolla e Shëndetit Publik të Universitetit Kombëtar të Seulit, zbuloi se 78.5 % e të anketuarve do të sakrifikonin të drejtën e tyre të privatësisë për të ndihmuar në parandalimin e një epidemie kombëtare.
Një tjetër arsye e suksesit të këtyre shteteve është përvoja e rajonit me epidemi të kaluara, si Sars në 2003, i cila infektoi 1,755 njerëz në Hong Kong dhe vrau 299, dhe Mers në 2015, që infektoi 186 njerëz në Korenë e Jugut dhe vrau 36 .
Studentët model të Azisë
Koreano Jugorët nuk kanë nevojë të marrin urdhra të detyrueshëm nga qeveria për të ulur numrin e infeksioneve kurse në shumë shtete të tjera aziatike, qeverive u është dashur të marrin një qëndrim më të ashpër për të siguruar bashkëpunimin e qytetarëve. Këto qëndrime kanë përfshirë gjoba si në Malajzi apo dhe dhunë si në Filipine.
Besimi dhe infrastruktura
Një nga arsyet e suksesit është gjithashtu infrastruktura e përparuar në Hong Kong dhe Korenë e Jugut. Siç deklaroi një analist, testimi dhe trajtimi në Kore, u ndihmua nga aeroporti I tyre i një klasi botëror, sistemi metro dhe sistemi i kujdesit shëndetësor. Vendi ka investuar në vetvete dhe qytetarët e tij janë duke korrur shpërblimet. Chang Kyung-sup, profesor i sociologjisë në Universitetin Kombëtar të Seul, tha se një situatë e tillë ishte bërë e mundur jo vetëm për shkak të bindjes së rreptë të qytetarëve, por edhe për shkak të një niveli të lartë besimi në qeveri.
‘Presidenti Moon Jae-in ka një reputacion mjaft të mirë në trajtimin e krizave dhe ky reputacion ndihmohet dhe nga komentet pozitive të vendeve të tjera.’- tha ai. /Opinion.al
