Sekretari amerikan i Shtetit, John Kerry gjatë një vizite në Irak, ka bërë një deklaratë të fortë në lidhje me Shtetin Islamik, ISIS.
Sekretari Kerry tha se ISIS i ka ditët e numëruara.
Ndërsa, theksoi se në këtë vend, Shteti Islamik ka humbur 40 për qind të territorit që kishte pushtuar.
Në një konferencë për shtyp të transmetuar nga Al Jazira, shefi i diplomacisë amerikanë ka kujtuar se, që nga viti i kaluar, trupat qeveritare irakiane i rrëmbyen organizatës terroriste qytetet Tikrit, Sinjar, Ramadi dhe në ditët e fundit, Hitin, në provincën perëndimore të Al Anbarit.
“100 drejtues të lartë të Kalifatit janë eleminuar, mes të cilëve ministrat e luftës dhe financave”, ka thënë Kerry.
Më tej, ai tha se avionët e koalicionit ndërkombëtar të udhëhequr nga SHBA kanë goditur puse nafte që ISIS përdorte për t’u financuar dhe kanë shkatërruar komplekse të ndryshme të përdorura për ruajtjen e parave, 6 prej të cilave vetëm në Mosul.
Gjithashtu ai vuri në dukje se në qytezën e Makhmurit po rritet prania e trupave që po bëhen gati për një ofensivë që të çojë në çlirimin e Mosulit.
