Përveç rrogave, dietave dhe përfitimeve të tjera financiare tashmë disa deputetë po trajtohen edhe me bonus qeraje nga Kuvendi.
Pak kohë më parë nënkryetari i Kuvendit, Myslim Murrizi, kërkoi në mbledhjen e Konferencës së Kryetarëve miratimin e një vendimi të posaçëm për t’u dhënë mundësi të gjithë deputetëve të rinj që të merrnin kredi pa interes, ose me interesa të ulëta për të blerë shtëpi në Tiranë. Buxhetit të shtetit nuk do ti kushtonte gjë akordimi i një fondi prej 1 milion eurosh për ti trajtuar me dinjitet deputetët që sipas tij “po flinin me çadra si arixhinjtë”.
Kjo kërkesë kaloi në heshtje në konferencë, por më pas iu adresua Bashkisë së Tiranës, e cila duhet t’i trajtojë deputetët me programet sociale, ndonëse rroga dhe bonuset që marrin i kalojnë 2 milionë lekë të vjetra në muaj.
Gazeta Shqiptare raporton se deri sa kjo kërkesë të trajtohet nga Bashkia e Tiranës, Kuvendi ka vendosur që një pjesë të mirë të tyre t’i trajtojë me bonus qeraje. Kuvendi ka publikuar pagat dhe përfitimet e tjera financiare të deputetëve, ku ajo që bie në sy është shtimi i numrit të deputetëve që trajtohen me kuotë për pagesën e qirasë së shtëpisë. Në total sipas raportit të shpenzimeve të Kuvendit për muajt gusht dhe shtator, Kuvendi ka paguar nga buxheti plotë 14 milionë lekë të vjetra, çka do të thotë që për 1 muaj ka paguar 7.5 milionë.
Kjo pagesë është bërë për 21 deputetë shumica e të cilëve janë nga opozita e re por nuk mungojnë edhe disa emra nga mazhoranca përfshi edhe dy ish-zëvendëskryeministra.
Deputetët që përfitojë bonos qeraje janë: Ilirian Pendavinji, Edmond Leka, Xhevit Bushaj, Edlira Bode, Fadil Nasufi, Fatmir Velaj, Luan Harusha, Dritan Bici, Senida Mesi, Niko Peleshi, Majlinda Halilaj, Nimet Musaj, Enada Kapllani, Arlind Çacani, Halil Jakimi, Nikolin Staka, Selami Jenisheri, Kostaq Papa, Vasil Sterjovski, Ervis Meço, Artemis Dralo /Opinion.al
