Policia e Lezhës ka vënë në pranga një 27-vjeçar, pasi dyshohet se ishte një nga autorët e shpallur në kërkim, për ngjarjen e ndodhur në datën 5 maj në Lezhë, ku kanë kërcënuar të afërmit e një kandidateje për deputete.
I riu akuzohet për veprat penale “kanosja apo dhunimi i pjesëmarrësve në zgjedhje” dhe armëmbajtje pa leje.
Mësohet se pas konsultimit me prokurorin, 27-vjeçari do të hetohet në gjendje të lirë.
“Në vijim të komunikatës së datës 05.05.2025, ku është shpallur në kërkim shtetasi Xh. S., 27 vjeç, si një nga autorët e dyshuar për veprat penale “Kanosja apo dhunimi i pjesëmarrësve në zgjedhje” dhe “Mbajtja pa leje dhe prodhimi i armëve, armëve shpërthyese dhe i municionit”, ju informojmë se:
Më datë 18.05.2025, nga Forcat e Posaçme Shqiponja në DVP Lezhë, u bë e mundur lokalizimi dhe kapja e shtetasit të shpallur në kërkim policor, Xh. S., 27 vjeç, banues në Lezhë. Në përfundim të veprimeve dhe pas konsultimit me Prokurorin, ky shtetas do ndiqet në gjendje të lirë”, njofton policia.
Materialet procedurale në ngarkim të këtij shtetasi i kaluan Prokurorisë pranë Gjykatës së Juridiksionit të Përgjithshëm Lezhë, për hetime të mëtejshme.
