Një xhami në Staten Island, New York City, është bërë shënjestër e disa kërcënimeve nga një burrë i “armatosur” me një tub metalik.
Siç raporton Steve Langford, gazetari i CBS2, kur myslimanët ishin duke kryer lutjet e Ramazanit në Qendrën Kulturore Islame Shqiptare, në Tompkinsville, të enjten në mbrëmje, imami ka vënë re një burrë që dukej shumë i zemëruar që shkonte në drejtim të tij.
“Dhe ai filloi menjëherë me mallkimet – ‘Ju myslimanët e mallkuar. Kam dëgjuar se ju jeni këtu për të na pushtuar. Ai filloi të bëjë edhe me gjeste – ‘Do t’ju pres. Do t’ju pres shumë keq’”, – citoi fjalët e të dyshuarit imami, Tahir Kukiqi, transmeton Koha.net.
Imami po ashtu ka thënë se ky burrë e kërcënoi me vrasje.“Jo vetëm mua, por të gjithë myslimanët”, tha Kukiqi.
Imami, i cili ka emigruar në SHBA nga Kosova 14 vjet më parë, ka thënë se dëshiron që të gjithë – posaçërisht i dyshuari – ta dinë qëndrimin e tij në vendin e tij të dytë, Amerikën.
“Ne konsiderojmë se ky vend është, si të them, parajsa e Zotit në tokë”, ka thënë Kukiqi.
Policia arrestoi Angel Mercado, 38 vjeç, adresa e të cilit është e shënuar si një shtëpi e braktisur, një bllok afër xhamisë.
Akuzat kundër të dyshuarit përfshijnë posedim të armës, ngacmim të shkallës së rëndë dhe kërcënim i shkallës së dytë – krim urrejtjeje.
Policia ka thënë se i dyshuari ka një histori të vjetër kriminale.
Vitin e kaluar, Policia në Staten Island kishin arrestuar një të dyshuar për lidhje me ISIS-in, pikërisht në muajin e Ramazanit. Atë kohë, imami Kukiqi pati thënë se terroristët e ISIS-it janë të çmendur, të cilët, sipas tij, nuk mund të quhen as njerëz.
“Këta njerëz së pari sulmojnë myslimanët. Ata na bëjnë të kalojmë nëpër ndjenja të rënda dhe dhimbje. Sa herë ndodh diçka, qoftë ajo e shtënë në Teksas apo një arrestim këtu apo atje, nuk ka lejon të jetojmë në paqe. Ata njerëz janë të çmendur. Nuk mundem madje t’i quaj as njerëz”, ishte shprehur Kukiqi një vit më parë./BW
