Policia ka shtuar masat e sigurisë ndaj prokurorit të çështjes së xhihadistëve, Eugen Beçit. Ai mësohet se ka marr kërcënime direkte në sallën e gjyqit nga të arrestaurit e ditëve të fundit.
Në mesin e tyre është edhe i arrestuari Medat Hasani, ish-oficer i forcave komando, i cili nën uniformën e ushtrisë ka shërbyer edhe në një mision ushtarak në Irak. Hasani pas largimit nga ushtria dyshohet se ka qenë edhe në luftën e Sirisë, nga ku është kthyer.
Medat Hasani bashkë me Xhezair Fishtin, Ergys Fasllian dhe Bekim Protopapën janë duke u mbajtur në qeli të veçuara, pa komunikim me njëri-tjetrin në ambientet e burgut 313 në Tiranë.
Në fillim të kësaj jave (ditën e hënë) Gjykata caktoi për ta masën e sigurisë arrest me burg. Prokuroria i akuzon se po planifikonin një sul terrorist në Shkodër, gjatë ndeshjes Izrael-Shqipëri. Për këtë arsye u vendos që ndeshja të luhet në Elbasan Arena në masa ekstreme sigurie.
Grupi hetimor ka mundur të sigurojë përgjime, filmime dhe fotografi që vërtetojnë ata kanë bashkëpunuar me njeri-tjetrin me qëllim kryerjen e akteve terroriste.
Po ashtu, ka prova se ata rekrutonin luftëtarë për t’i dërguar në Siri për të luftuar për ISIS, si dhe shpërndanin materiale propagandistike pro Shtetit Islamik.
Te lidhura:
