TIRANE- Mbetet ende mister se pse u kërcënua një profesor si Mynyr Koni teksa konkuronte për rektor i UT-së, garë të cilën më pas e fitoi. Fillimisht u tha se banda e Shullazit kërcënoi Mynyr Konin me porosi të Partisë Socialiste e cila mbështeste në këtë garë kandidaten Klodeta Dibra. Më pas në media doli se prokuroria po heton direkt kandidaten Klodeta Dibra, pasi kërcënimi është porositur direkt prej saj. Dhe së fundmi ka një hipotezë tjetër. Banda ka kërcënuar vetë Konin, duke synuar pronat që administron Universiteti.
TCH duke iu referuar burimeve në prokurori thotë se me ligjin e ri, universiteti do të menaxhojë më shumë prona.
“Qyteti Studenti” me hyrjen në fuqi të ligjit për arsimin do të gdhihet pronë e Universitetit të Tiranës. Projektet për kampusin e ri universitar dhe 30 milion eurot që i mungojnë atij për ta ndërtuar, janë një arsye e mjaftueshme për të ngjallur interesat e investimeve private, përfshirë edhe paratë e grumbulluara nga aktivitete kriminale.
“Këtu duhet gjetur edhe përgjigjja përse, sipas Prokurorisë, grupe kriminale si ai i Shullazit tentuan të ndërhyjnë në garën për rektor të universitetit më të madh në vend”, thuhet në lajmin e tch.
