Një kabull elektrik i tensionit të lartë është këputur këtë të hënë në Elbasan, ndërsa rreth 100 familje në njësinë e Bradasheshit kanë shpëtuar mrekullisht.
Sipas të dhënave rreth një mijë e 766 abonentë kanë mbetur pa energji elektrike, ndërsa raportohet se ngjarja ka shkaktuar dëmtime të mëdha në banesat e tyre, duke i prishur pothuajse të gjitha pajisjet elektrike.
Banorët në një prononcim për gazetarët janë shprehur se është herë e tretë që diçka e tillë ndodh ndërsa akuzojnë shtetin se nuk ka marrë masa.
“Hera e tretë që më ndodh. Si ka mundësi të shpërthejnë telat në një tension. Këtu është defekti gjithmonë. Si ka mundësi? Duhet të bëhet verifikimi çfarë na është dëmtuar nëpër shtëpi dhe të rregullohet. Janë përvëluar 3 shtyllëzime.”- tha një banor.
Një tjetër banore kërkoi rimbursim të plotë nga shteti për dëmet e shkaktuara, ndryshim të linjës pasi ndihen të pasigurt.
“Plasën pajisjet sikur ra automatiku, aq shumë ra. Ka ndodhur 3 herë. Nëse shteti nuk na do të na vërë flakën dhe të na djegim. I duam të gjitha pajisjet e shtëpisë dhe të ndërrohet menjëherë linja. Është nxirë komplet. Ne në dorë të shtetit jemi.”- tha banorja.
OST dhe OSHEE ndodhen në vendin e ngjarjes dhe po punojnë për të zgjidhur këtë problematikë në Bradashesh.
