Kreu i Lëvizjes Vetëvendosje, Albin Kurti dhe Lidhjes Demokratike e Kosovës, Isa Mustafa kanë nënshkruar sot marrëveshjen për koalicionin bashkë qeverisës.
Siç ishte parashikuar një ditë më parë, dy partitë më të mëdha të dala nga zgjedhjet e 6 tetorit janë dakorduar mbi të gjitha duke i hapur kështu rrugë formimit të qeverisë së re të Kosovës e cila pritet të votohet ditën e nesërme.
Të dy kryetarët e partive njoftuan nënshkrimin e marrëveshjes në një konferencë të përbashkët për mediat.
“Kur na ndanë vetëm një ditë nga seanca e Kuvendit të Kosovës në të cilën do të zgjedhim Qeverinë e re. Ne sot u takuam me kryetarin e LDK-së profesor Isa Mustafën, u takuam dhe u dakorduam të takohemi edhe nesër në seancë ta zgjedhim qeverinë e re. Ne tashmë e kemi nënshkruar marrëveshjen, jemi marrë vesh për të gjitha, edhe për ndarjen e përgjegjësive në kuadër të qeverisë së re ku do të bashkëqeverisim”, është shprehur Kurti.
“Ne kemi arritur marrëveshje. Besoj se është një marrëveshje e mirë, është në interes të ndryshimeve që duhet të ndodhin domosdoshmërisht në vendin tonë. I kemi hulumtuar të gjitha alternativat dhe mundësitë. Ajo që dëshirojmë në të ardhmen është që kjo qeveri të jetë e suksesshme dhe t’i realizojë pritjet e tyre”, u shpreh Mustafa
Ata thanë se në bazë të marrëveshjes së arritur, qeveria e re do të ketë 15 ministri, nga të cilat 6 do të udhëhiqen nga VV, 6 nga LDK dhe 3 nga pakicat komunitare. Sa i përket kreut të Kuvendit, Albin Kurti u shpreh se Glauk Konjufca “nuk do të japë dorëheqjen por do të kalojë në ekzekutiv”, çka ishte parashikuar edhe më herët.
Të pyetur për postin e Presidentit të Republikës, kreu i LDK-së, tha se kjo çështje “nuk është përfshirë” në marrëveshjen e nënshkruar sot pasi ajo është lënë për tu diskutuar në një moment tjetër.
Kosova zhvilloi zgjedhjet e parakohshme më 6 tetor, pas dorëheqjes së kryeministrit Haradinaj. Lëvizja Vetëvendosje u shpall fituese e këtyre zgjedhjeve duke marrë një deputet më shumë se LDK-ja. Megjithatë negociatat mes tyre për qeverisje të përbashkët vazhduan për rreth 4 muaj. Shkak për zgjatjen e bisedimeve u bë posti i Presidentit të Republikës dhe ai i Kryetarit të Kuvendit. /Opinion.al
