Kryeministri Edi Rama ka marrë pjesë sot në Konferencën Kombëtare të Arsimit të Lartë si edhe në prezantimin e Dokumentit të Politikave të Arsimit të Lartë 2030.
Gjatë fjalës së tij, Rama tha se arsimi i lartë sot është përmirësuar në krahasim me 10 vite më parë.
Ai u ndal gjithashtu tek rritja e cilësisë te Universitetit Bujqësor, ku tha se deri në vitit 2030 diplomat e këtij universiteti do të jenë të barazvlefshme me diplomat e Universitetit të Bokut në Vienë.
”10 vite më parë kishim një fazë barbare me universitete. Ne kemi 5 fishuar buxhetin për kërkimin shkencor dhe duhet të synojë doktoratura të niveleve europiane…Një nga zhvillimet më të bukura që ne po përjetojmë është zhvillimi në universitetin bujqësor, ai dukej si realitet i destinuar që të mbetej si një lloj kampo refugjatësh që nuk arrinin dot të arrinin botën universitare dhe të mblidheshin te bujqësori me pesa. Ne arritën që ta fusim bujqësorin në trajektore komplet tjetër.Deri në 2030 diplomat e bujqësorit të jenë si diplomat e Bokut të Vienës, dhe anasjelltas.
Në fund dua ta mbyll duke thënë që një fokus i veçantë i duhet dhënë inteligjencës artificiale, është domosdoshmëri dhe oportunitet i jashtëzakonshëm, sepse nuk ka fare rëndësi se në cilën pikë të globit je, mjafton që të përputhen kushtet minimale që ti krijon dhe të dhënat që ti vendos në dispozicion. Çdo universitet duhet ta krijojë menjëherë atë laboratorin e vetë modest dhe çdo pedagog duhet të ketë mundësinë të trokasë në derën e atij laboratori”, u shpreh Rama.
