Pas denoncimeve të bërë nga kandidati i koalicionit “Bashkë Fitojmë”, Belind Këlliçi për mungesë investimesh, të çerdheve dhe kopshteve në Astirë, kandidati i PS, Erion Veliaj e kë rikthyer vëmendjen pikërisht në këtë zonë.
Pasi premtoi se do të ndërtonte një çerdhe dhe një kopsht në një zonë ku jetojnë mijëra qytetarë, Veliaj sot ka ironizuar rivalin tij të koalicionit “Bashkë Fitojmë” për premtimin e ndërtimit të nënkalimit në sheshin “Skënderbej”.
Edhe pse 8 vite në drejtimin e bashkisë së kryeqytetit, Veliaj thotë nuk ka mundur të investoj më shumë në zonën e Astirit pasi nuk e ka lejuar opozita.
Veliaj kujtoi gjithashtu edhe faktin se në Astir nuk kishte as ujë dhe banorët furnizoheshin nga puset e Laknasit, ndërsa sot është ndërtuar rrjeti i ujësjellësit.
“Kur shoh taksat e Shkodrës, trefish sa Tirana, shërbimet tre herë më keq se Tirana. Kemi arritur të bëjmë më shumë punë me më pak para, kjo është aftësia e menaxhimit. Meqë këta marrin më shumë taksa në Shkodër dhe kanë vetëm një linjë autobusi, pse nuk e bëjnë falas në Shkodër? A e kuptoni që Saliu dhe Ilir Meta kanë dy programe?! Është një fushatë, por kanë dy programe. Një program është për ata që tashmë i kanë gënjyer. Kjo do të thotë që nuk e premtojnë dot në Shkodër, se në Shkodër i kanë gënjyer njëherë dhe nuk e hanë njerëzi për së dyti. Kurse një program është për ata që duhet me i rrejt. Pra për ata që nuk u kanë dhënë ende besim dhe duhet të thonë gënjeshtra të reja. Ne këto gënjeshtra me mbikalime me nënkalime i pamë këtu tek Astiri. Ja këtu i kishim nënkalimet. Po ishin dashnorë nënkalimesh ata na kishin lënë të punonim. A ju kujtohet “Zogu i Zi”? Edi Rama e bëri nënkalimin aty, gjëja e parë që shkatërruan. Dhe në qoftë se doni të dini se çfarë gropash i bëjnë këta qendrës së Tiranës, mjafton të kujtoni gropën e Hajdin Sejdisë që e lanë 30 vjet aty. Është shumë kollaj sot të thuash me ne fitojnë të gjithë, por kështu thoshte dhe Sudja. “Kështu thoshte dhe Saliu në ‘97 dhe e pamë çfarë fituam të gjithë. Noc Rrokun fituam të gjithë. Sepse të gjithë dhanë kursimet e tyre, dhanë apartamentet e tyre, dhanë gjithçka që kishin dhe pastaj Sudja mbylli qepenin. Sot Sudja nuk është me fustan, sot Sudja është me pantallona, por janë e njëjta racë”, tha Veliaj./Opinion.al
