Teksa Kuvendi pritet të shqyrtojë dekretin e Presidentit, Bujar Nishani për kthimin mbrapsht të Ligjit të Importit të Mbetjeve, Bashkimi Europian i thotë OK ndryshimeve ligjore të qeverisë për importin e plehrave për riciklim dhe jo për depozitim.
Në përgjigjen zyrtare drejtuar palës shqiptare Komisioni Europian thotë se për kapacitetet ricikluese që ka Shqipëria dhe infrastrukturën në menaxhimin e mbetjeve amendimet janë të mirë përshtatura.
“Duke marrë në konsideratë situatën specifike të Shqipërisë në fushën e menaxhimit të mbetjeve dhe mungesën e infrastrukturës së duhur për menaxhimin e mbetjeve në vend, ne besojmë se amendimet e ligjit për menaxhimin e integruar të mbetjeve janë të mirë adaptuara dhe të përshtatshme për Shqipërinë në këtë moment.”
Brukseli thotë se me përafrimin në Bashkimin Evropian Shqipërisë do t’i duhet të bëjë të tjera ndryshime në ligj për të hapur tregun e importit të mbetjeve në përputhje me legjislacionin e BE-së.
“Ndërsa Shqipëria ndërton kapacitetet e saj për të përballuar menaxhimin e mbetjeve në vitet që vijnë, ne presim që të jetë në një pozicion më të mirë për të përshtatur plotësisht legjislacionin e BE-së kur anëtarësimi të bëhet i pashmangshëm”.
Miratimi për ligjin e Importit të Mbetjeve u shoqërua me jo pak debate, duke ngjallur reagimin e shoqatave ambjentalisteve dhe kundërshtimin e opozitës./ TV KLAN
