Kandidati i Trump për anëtar i Gjykatës së Lartë, Brett Kavanaugh dhe gruaja që e ka akuzuar se e ka sulmuar seksualisht kur të dy ishin adoleshentë, kanë të dalë këtë të enjte para Senatit.
Christine Blasey Ford paraqiti versionin e saj të incidentit që ajo thotë se ka ndodhur, sipas së cilit, Kavanaugh e sulmoi gjatë një feste kur të dy ishin në shkollë të mesme.
I emëruari i Gjykatës Supreme të SHBA-ve, Brett Kavanaugh është akuzuar për abuzim seksual nga tre gra. Kavanaugh i mohon të gjitha akuzat kundër tij, por pavarësisht kësaj, ai u vendos që të dëshmojë në Komisionin e Posaçëm të Senatit për disa nga akuzat që kanë ngritur kundër tij.
Christine Blasey Ford, profesoreshë psikologjie dhe statistike u shpreh se ishte “100% e sigurt” se personi që e kishte sulmuar në 1982-shin ishte Kavanaugh, aktualisht i emëruar nga Presidenti Trump për anëtar i Gjykatës së Lartë.
Gjykatësi Kavanaugh dhe akuzuesja e tij, profesore Christinë Blasey Ford vetë dhanë dëshmi emocioane para senatorëve dhe para publikut amerikan që e ndoqi gjatë gjithë ditës seancën nga e cila varen vendime të rëndësishme për të ardhmen e proesit të konfirmimit të kandidatit të gjykatës së lartë. Shoqata e Juristëve Amerikanë nxiti Komisionin Juridik dhe Senatin ta shtyjnë votimin që t’i japin kohë FBI-së që të bëjë një kontroll të detajuar të figurës së gjykatësit Kavanaugh lidhur me pretendinet e tre grave kundër tij.
Profesorja e Universitetit të Palo Altos, Christine Blasey Ford dha një dëshmi emocionale para Komisionit Juridik të Senatit.
“Jam sot këtu sot, jo se kisha dëshirë të isha. Jam e tmerruar. Jam këtu sepse besojn se është detyra ime qytetare t’ju them se çfarë më ndodhi kur Brett Kavanaugh dhe unë ishim në shkollë të mesme”, tha ajo.
Ndërsa gjithë vendi shikonte, zonja Ford dha detajet e sulmit seksual për të cilin ajo akuzon gjykatësin Kavanaugh dhe që ajo thotë se ndodhi kur ishin të dy adoleshentë në fillim të viteve 1980.
““Mendova se do të më përdhunonte. Thirra për ndihmë dhe kur e bëra këtë, Bretti ma zuri gojën me dorën e tij që të mos më lejonte të bërtisja. Kjo ishte gjëja që më tmerroi më shumë dhe që pati ndikimin më të gjatë në jetën time”.
Profesore Ford u tha senatorëve se është “100 për qind e sigurt” se zoti Kavanaugh ishte personi që e sulmoi ndërsa një nga shokët e tij shihte dhe u pyet se çfarë i kishte mbetur më shumë në kujtesë nga incidenti.
“E qeshura, e qeshura e bujshme mes të dyve dhe fakti që po zbaviteshin në kurrizin tim”.
Pas dëshmisë së saj, kandidati për Gjykatën e Lartë, Kavanaugh doli para komisionit dhe dha një deklaratë emocionale dhe sfiduese, duke hedhur poshtë akuzat.
“Nuk po e diskutoj nëse Dr. Ford është sulmuar seksualisht nga dikush, diku, dikur. Por kurrë nuk kam bërë një gjë të tillë me të, ose me dikë tjetër. Nuk jam një person i tillë, nuk kam qenë kurrë person i tillë”.
Zoti Kavanaugh tha se emri i tij dhe familja e tij, “janë shkatërruar përgjithmonë” nga akuzat kundër tij dhe sulmoi me zemërim demokratët për atë që ai e quajti, fushatë shpifjesh, që ka si synim t’i mohojë vendin në Gjykatën e Lartë.
“E gjithë kjo përpjekje prej dy javësh ishte një goditje e përllogaritur dhe e orkestruar politike, e amplifkuar nga zemërimi për zgjedhjen e Presidentit Trump në vitin 2016, një frikë që është provokuar padrejtësisht për historinë time juridike, hakmarrje në emër të Clintonëve dhe milliona dollarë nga grupe të jashtme të majta të opozitës”.
Zonja Ford është një nga disa gratë që janë ankuar për zotin Kavanaugh, disa prej të cilave publikisht ndërsa disa kanë zgjedhur të mbeten anonime.
Senatori republikan, Lindsay Graham humbi qetësinë, duke akuzuar demokratët për një “farsë joetike”.
“Ju doni të shkatërroni jetën e këtij personi, ta mbani këtë vend në Gjykatë hapur dhe shpresoni të fitoni në vitin 2020. E keni thënë vetë. Kjo është farsa më joetike që kur kam hyrë unë në politikë”.
Në korrik, Presidenti Donald Trump emëroi gjykatësin e Gjykatës së Apelit për një vend në Gjykatën Supreme. Ligjvënësit filluan të shqyrtonin rekordin e Kavanaugh mbi çështjet e diskutueshme si aborti dhe emigracioni.
Kryetari i Komisionit Juridik, Senatori Chuck Grassley e hapi seancën duke i dalë në mbrojtje të emëruarit për Gjykatën e Lartë dhe duke fajësuar demokratët që nuk i kishin bërë të ditura akuzat që më parë./Opinion.al-WSJ
