Zbardhen vjedhjet në disa banesa në rrethin Kavajë, ndërkohë që policia ka arrestuar autorin e tyre. Uniformat blu kanë vënë në pranga shtetasi K. H., 33 vjeç banues në Kavajë.
“Si rezultat i hetimeve të kryera me objektiv zbardhjen e vjedhjeve dhe nxjerrjen e autorëve të tyre para përgjegjësisë penale, Komisariati i Policisë Kavajë finalizoi operacionin “Seria”, në kuadër të të cilit u identifikua, u kap dhe u vu në pranga shtetasi K. H., 33 vjeç, banues në Kavajë.
Nga hetimet ka rezultuar se gjatë periudhës gusht 2024-shkurt 2025, ka vjedhur pajisje dhe sende në 3 banesa në Kavajë dhe në fshatin Synej”, thuhet në njoftimin e policisë.
Në vijim të veprimeve procedurale policia konstatoi se në banesën e shtetasit K. H. kishte një sasi Cannabisi. Vijojnë hetimet për të zbardhur vjedhje të tjera që mund të ketë kryer ai.
Materialet procedurale iu referuan Prokurorisë së Durrësit, për veprime të mëtejshme.
