Gazeta e njohur greke Kathimerini shkruan se vdekja e Pëllumb Marnikollaj mund të shndërrohet në një problem serioz mes Shqipërisë dhe Greqisë. Ndërsa ka publikuar edhe detaje të reja për këtë çështje.
Gazeta e madhe greke, Kathimerini, ka publikuar të premten disa detaje të reja për vdekjen e shtetasit shqiptar Pëllumb Marnikollaj.
Ajo citon raportin e policisë, sipas të cilit dy policë, një femër dhe një mashkull, i komunikuan Marnikollës, një urdhër të ri ndalimi ndaj tij, lëshuar nga drejtoria policore e Pireut.
Urdhëri i ndalimit kishte të bënte me një grabitje të ndodhur ato ditë në zonën e Pireut, për të cilën dyshohej si autor shtetasai shqiptar.
Gjithmonë sipas citimit të gazetës Kathimerini: Pëllumb Marnikollaj nuk kishte pranga në duar në momentin që iu komunikua urdhër ndalimi dhe duke konsideruar se zyrat ndodheshin në të njëjtën lartësi si në fasadën e përparme të godinës, hapi ballkonin dhe u hodh për t’iu shmangur arrestimit.
Mirëpo, në pjesën e mbrapme kishte dhe dy kate të tjera dhe 29 vjeçari ra me kokë, duke u plagosur në mënyrë vdekjeprurëse, bën të ditur gazeta duke iu referuar raportit të policisë.
Kathimerini vë në dukje se kjo çështje ka marrë përmasa politike në Shqipëri dhe se mund të shndërrohet në një problem bilateral midis shtetit shqiptar dhe atij grek.
Gazeta greke citon deklaratat e presidentit Nishani dhe të kryeministrit Rama për këtë çështje, dhe komenton se politikanët shqiptare duket se po adoptojnë versionin e vdekjes për shkak të torturave dhe po kërkojnë hetime të mëtejshme.
“Edhe pse avokatja greke që pajtoi vëllai i viktimës, i tha televizionit Top Channel se sipas ekspertizës mjeko-ligjore Marnikollaj nuk kishte shenja dhune në trup, të afërmit kërkojnë ekspertizë nga autoritetet shqiptare dhe insistojnë se 29 vjeçari u torturua dhe pastaj e hodhën trupin nga ballkoni”, shënon gazeta greke, Kathimerini.
