Kastriot Ismailaj ka qenë sot i pranishëm në seancën ndaj tij në Gjykatën e Krimeve të Rënda një ditë pasi prokuroria urdhëroi ti konfiskoheshin llogaritë bankare me vlerë 3.2 milionë dollarë dhe 450 mijë euro.
Që në fillim të seancës, Ismailaj ka kërkuar që të mos zhvillohej gjyqi, pasi të gjitha dokumentet që kishte përgatitur për të bërë mbrojtjen i kishte avokati i tij Vladimir Meçe i cili mungoi në seancë. Trupi gjykues, pasi është tërhequr në dhomën e këshillimit, ka vendosur që të mos e pranojë kërkesën e të pandehurit dhe i ka kërkuar atij që t’i bëjë prezente vetë konkluzionet përfundimtare.
Por i pandehuri Kastriot Ismailaj nuk ka pranuar, duke iu drejtuar trupit gjykues me fjalët: “Është e pamoralshme dhe antikushtetuese që të vijojë seanca duke u mbështetur në nenet që ju thoni, pasi unë nuk kam dijeni për nenet që lexuat, ndaj nuk do të flas as edhe një fjalë pa praninë e avokatit. Të gjitha dokumentet ku janë të parashtruara të gjitha faktet dhe provat i disponon avokati. Ndaj do ju lutesha që të mos nxitoheni, pasi paratë ju i keni të bllokuara”.
Biznesmeni Kastriot Ismailaj ka qenë shumë i irrituar me vendimin e trupit gjykues dhe është shprehur se ai nuk flet pa u këshilluar avokatin e tij. Ismailaj ka deklaruar gjithashtu, se për të bërë mbrojtjen ai është konsultuar edhe me ekspertë të huaj.
Biznesmeni Kastriot Ismailaj po përballet me drejtësinë për aferën “CEZ-DIA” . Ismailaj akuzohet se përmes një skeme mashtrimi përvetësoi shumën prej 5 milionë eurosh nga CEZ.
