Ish-Drejtori i Arkivit të Ministrisë së Brendshme, Kastriot Dervishi, sot, ka reaguar për hapjen e dosjeve të Sigurimit të Shtetit, duke e konsideruar një deklarim televiziv dhe propagandistik.
Me anë të një shënimi në Facebook, Dervishi shkruan se “dosja e parë” e hapur nga Autoriteti për Informimin në Dokumentet e ish-Sigurimit të Shtetit, që i përket Musine Kokalarit, prej më shumë se 10 vitesh, familja Kokalari është njohur me të.
Ai thekson se dosja e hapur, mban numrin arkivor 2912 dhe përbëhet nga 119 fletë, i përket kohës së përpunimit të saj, është ‘gatuar’ nga 12 punëtorë operativë.
“Pavarësisht se ka shumë dokumente të dosjes hetimore-gjyqësore dhe ndonjë element përpunimi nga vitet 1945-1946, përpunimi i Musinesë fillon rregullisht në vitin 1955. Deri në vitin 1962 ka qenë në përpunim aktiv 2A. Në vitet 1962-1978 ka qenë në kontroll operativ 2B dhe në vitet 1978-1983 sërish në përpunim aktiv 2A”, shkruan Dervishi.
Ish-Drejtori i Arkivit në Ministrinë e Brendshme, ka theksuar se përveç propagandës, aktiviteti kishte edhe shumë lajme të pavërteta në lidhje me sasinë e dosjeve që janë subjekt i ligjit.
Sipas tij, dosje përpunimi (përndjekje) personash janë rreth 10 mijë. Ndërsa, 99.99 për qind e personave për të cilët është hapur dosje, kanë vdekur.
“Nga ky grup (këtë e kam nga përvoja ime), të interesuar mund të jenë deri 5% e trashëgimtarëve të këtyre dosjeve. Le ta nxjerrin këtë listë, se është ajo. Kot mundohen ta shtojnë apo ekzagjerojnë shifrën e dosjeve të këtij lloji me dosje të tjera administrative dhe hetimoro-gjyqësore, apo duke vlerësuar kartelat model 1 dhe model 2 si dosje”, shkruan Dervishi.
Ai nënvizon se në këtë kuptim, thelbi i ligjit bie vetvetiu.
“Nuk është kurrë e tepërt që miliona euro që do harxhohen kot së koti për eksperimente propagandistike të këtij lloji të kalojnë për rrjetin arkivor të Shqipërisë se është në ditët më të vështira të tij.
Unë i kujtoj autoritet që kanë në dorë financat se rrjeti arkivor i Repubikës së Shqipërisë nuk ka depo. Është e tepërt të tallesh në këto forma kur nuk janë përmbushur detyrimet ligjore ndaj arkivave. Asnjë autoritet i këtij lloji në vendet e lindjes nuk ka shkatërruar arkiva siç po vërehet në Shqipëri.
Së fundit, meqë ra fjala, për kureshtje, 5 dosjet e para i takojnë këtyre personave:
1-Irfan Majuni
2-Selman Ndreu
3-Isuf Limaja
4-Thoma Katundi
5-Nikolin Goçi”
Foto:
