Një 13-vjeçar, i cili i ka mbijetuar sulmit të personave të dyshuar të karteleve të drogës në Meksikë ndaj disa amerikanëve mormonë, mësohet të ketë fshehur 6 motrat dhe vëllezërit e tij në shkurre, para se të ecte 23 kilometra për të kërkuar ndihmë.
Të tetë fëmijët i kanë mbijetuar sulmit të së hënës në veri të Meksikës, në të cilin kanë vdekur tri gra dhe gjashtë fëmijë. Mediat amerikane kanë thënë se pesë fëmijë kanë marrë plagë nga plumbat.
Viktimat janë anëtarë të familjes LeBaron, e lidhur me komunitetin mormon. Incidenti ka ndodhur në fillim të kësaj jave në Ranço de la Mora, një zonë famëkeqe për trafikantët e drogës.
Pjesëtarë të kësaj familje janë shprehur se ky komunitet, i njohur për ngritje të zërit kundër dhunës së karteleve të drogës është përballur me kërcënime edhe në të kaluarën.
Presidenti meksikan, Andrés Manuel López Obrador, ka thënë se Meksika do të veprojë me “pavarësi dhe sovranitet” për të gjetur kriminelët mbrapa këtij sulmi.
Ndërkohë Presidenti Trump ka thënë se është i “gatshëm” për të ofruar mbështetje për luftim të dhunës së karteleve në Meksikë./Opinion.al/
